Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 335 Hüküm no: 435 Orijinal metin no: [64a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yetimin nâzırı ile vasîsinin hesap üzerinde anlaştıkları Mahmiye-i Galata müzâfâtından Beşiktaş’da vâki‘ Sinan Paşa mahallesi sâkinlerinden olup bundan akdem vefât eden merhûm Osman Bey b. Durmuş nâm reis-i sultânînin sulbî oğlu Durmuş nâm sagīrin kıbel-i şer‘den nâzırı olan Haydar Bey b. Abdullah nâm kimesne meclis-i şer‘-i hatîr-i lâzımü’t-tevkīrde işbu sâhibü’l-kitâb sagīr-i mezbûrun vasîsi olan Hüseyin Bey b. Abdullah nâm za‘îm muvâcehesinde takrîr-i kelâm ve ta‘bîr ani’l-merâm edip sagīr-i mezbûr Durmuş’a babası merhûm Osman Bey’den irs-i şer‘le intikāl eden hisse-i şer‘iyyesinin sene dokuz yüz doksan sekiz Recebi’l-müreccebi’nin gurresinden târih-i kitâba değin bi hasebi’ş-şer‘i’ş-şerîf muhâsebesi zeyl-i kitâbda mastûretü’l-esâmî olan müslümanlar huzûrunda görüldükde vasiyy-i mezbûrun makbûzu nukūddan doksan beş bin akçe olup ve meblağ-ı merkūm doksan beş bin akçenin ba‘zısı merbûh ve ba‘zısı gayr-ı merbûh olmağla cümle ribhden kırk altı bin dört yüz otuz altı akçe hâsıl olup ve sagīr-i mesfûrun li eb ve üm kız karındaşı Fâtıma nâm sagīreden irs-i şer‘le intikāl eden nukūddan hisse-i şer‘iyyesi yirmi dört bin yüz yetmiş yedi akçe olup ve sagīr-i merkūm Durmuş’un bâlâda zikr olunan doksan beş bin akçe nukūddan İstiko nâm zimmîye elli iki bin akçe verilip mukābelede mezkûr İstiko Ortaköy’de vâki‘ mülk menzilini sagīr-i mersûma meblağ-ı mesfûr elli iki bin akçeye bey‘ edip menzil-i mastûrun icâresinden bin beş yüz akçe hâsıl olup cem‘an vasiyy-i mezbûrun makbûzu yüz altmış yedi bin yüz on üç akçe olup ve meblağ-ı merkūm yüz altmış yedi bin yüz on üç akçenin masrafı dahi görüldükde cem‘an ihrâcât altmış yedi bin beş yüz yirmi akçe olup ba‘de’l-ihrâcât vasiyy-i mezbûrun zimmetinde doksan dokuz bin beş yüz doksan üç akçe bâkī kalmışdır el-hâletü hâzihî ba‘de’l-yevm husûs-ı mezbûra müte‘allik murâbaha ve nukūddan nezâretim hasebiyle da‘vâ ve nizâ‘ım kalmadı dedikde mâ hüve’l-vâki‘ alâ vukū‘ihî vasiyy-i mezbûr Hüseyin Bey talebi ile ketb ve terkīm olundu. Tahrîren fî evâsıtı şehri Zilka‘de sene sitte ve elf. Şuhûd: Fahrü’l-müderrisîn mevlânâ Mustafa Efendi b. Hasan, eş-Şeyh İbrahim b. Mehmed, Kadri Halîfe b. Abdullah, Kurd Çavuş b. Mehmed el-kâidü’s-sultânî, Savcı Çavuş b. Hamza, Mehmed Bey b. Abdullah, Murad Bey b. Abdullah …?, Murad Ağa b. Abdullah, Ahmed Bey b. Abdullah, Süleyman Ağa b. Abdullah, Şaban Bey b. Abdullah, Hasan Reis b. Abdullah, diğer Murad Bey b. Abdullah el-Cündî, Kaba Ömer b. Mehmed, Hüsrev b. Abdullah el-Muhzır, Mehmed b. Ali el-Muhzır ve gayruhüm mine’l-hâzırîn