Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 336 Hüküm no: 436 Orijinal metin no: [64b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râziye Hatun’un mehir alacağı olduğu Udûlden el-Hâc Hızır Halîfe b. Murtaza ve el-Hâc Ferhad b. Abdullah nâm kimesneler meclis-i şer‘-i şerîf ve mahfil-i dîn-i münîfe hâzırân olup, dâhil-i mahmiye-i Galata mahallâtından Şehsüvar mahallesinde bundan akdem fevt olan merhûm Haydar b. Abdullah’ın Ömer, Osman ve Âmine nâm evlâd-ı sıgārına kıbel-i şer‘den mansûb vasî olan Mehmed Reis b. Abdullah nâm kimesne mahzarında, merhûm-ı mezbûrun zevcesi ve vârisi hâmiletü hâze’l-kitâb Râziye Hâtun bt. Seyfullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müdde‘iye-i mezkûrenin müteveffâ-yı mesfûrun zimmetinde, nikâhında ma‘kūdun aleyh olan mehr-i müecceli cihetinden lâzımü’l-edâ ve vâcibü’l-kazâ râyicü’l-vakt bin akçe hakkı vardır. Müdde‘iye-i mezbûrenin meblağ-ı merkūmu kısmen veya tamâmen müteveffâ-yı mezkûrdan veya vekîlinden ahz ü kabz etmediğine, hibe etmediğine, bi vechin mine’l-vücûh zimmetini ibrâ etmediğine dâir yemîn etmesinden sonra şâhidlerin şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın hâkim-i askerî, şehâdetleri mûcebince meblağ-ı mezbûrun müteveffâ-yı mezbûrun muhallefâtından müdde‘iye-i mersûmeye ödenmesine hükm etti. Cerâ zâlike ve hurrire fî evâsıtı şehri Zilka‘de sene sitte ve elf. Şuhûd: Ahmed Reis b. İlyas, Said b. Abdullah, Hasan b. Abdullah, el-Hâc Mustafa b. Murad, Veli Reis b. Ali, Hüsrev b. Abdullah, Mehmed b. Ali ve gayruhüm