Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 341 Hüküm no: 442 Orijinal metin no: [65b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Habibe Hatun’un sağlığında torununa ve câriyelerine bağış yaptığı Kazâ-i İbradı sükkânından olup husûs-ı âti’z-zikri da‘vâya kendi tarafından asâleten ve karındaşı Ahmed tarafından alâ tarîki’s-sübût vekîl-i şer‘îsi olan Mahmud b. Nebi nâm kimesne hâric-i Galata’da Cihangir mahallesinde sâkine iken fevt olan Habibe Hâtun’un usûbet-i nesebiyye tarîkiyle vârisleri olduklarını nakl-i şehâdet ile isbât eylediklerinden sonra mezbûre Habibe Hâtun’un oğlu Abdullah Çelebi’nin zevcesi Râziye tarafından vekîli ve kızı Fâtıma tarafından vasîsi olan el-Hâc Ali b. Abdullah nâm şahsı mahfil-i kazâya ihzâr ve mahzarında takrîr-i kelâm edip biz üslûb-ı muharrer üzre vârisi olduğumuz mezbûre Habibe Hâtun sâlifü’z-zikr Râziye ve kızı Fâtıma ile bir yerde sâkinler iken fevt olup cümle muhallefâtı kendilerde kalmış iken hâlen hisse-i şer‘iyyemizi vermekde te‘allül ederler suâl olunup alıverilmesini taleb ederiz deyicek gıbbe’s-suâl mezbûr el-Hâc Ali vekâleti ve vesâyeti hasebiyle cevâb verip fi’l-hakīka mezbûre Habibe Hâtun oğlu merhûm Abdullah Çelebi’nin zevcesi müvekkilem Râziye ve vasîsi olduğum kızı Fâtıma ile bir yerde sâkin iken fevt olmuşdur lâkin fevt olmazdan mukaddem hâl-i hayâtında ve kemâl-i sıhhatinde mâmelekini bir yere cem‘ edip ahâlî-i mahalleden vaz‘ ve şerîf ve sıgār ve kibâr huzûrunda esbâbının ba‘zısını mu‘takalarına hibe ve tasadduk edip ve mâlik olduğu nukūddan dahi Kamer nâm câriyesine iki bin ve Peymâne ve Hatice ve Belkıs nâm câriyelerine biner akçe verip ve bundan mâ‘adâ bâkī altmış bin akçesi kalıp onu dahi mezbûre Habibe’nin oğlu kızı Fâtıma’ya hibe ve temlîk edip yine hâl-i hayâtında ben vesâyetim hasebiyle kabz eylemiş idim ziyâde bir akçe ve bir habbesi kalmamışdır deyicek müdde‘î-i mezbûr Mahmud’un zikr olunan hibe husûsunu inkârından sonra mezkûr el-Hâc Ali’nin da‘vâsına muvâfık beyyine taleb olundukda udûl-i müslimînden mahalle-i merkūme imâmı Mustafa Halîfe b. Hoca Cihan ve fahrü’l-akrân Mehmed Çavuş ve Ahmed b. Lütfi nâm müezzin ve Ferruh b. Abdullah nâm müezzin ve Cafer b. Abdullah ve Musa b. Yahya nâm kimesneler li ecli’ş-şehâde hâzırûn olup ve edâ-i şehâdet-i şer‘iyye edip fi’l-hakīka merkūme Habibe Hâtun hâl-i hayâtında oğlu Abdullah Çelebi’nin kızı mezbûre Fâtıma’ya altmış bin akçe hibe edip ve câriyelerine dahi üslûb-ı muharrer üzre tasadduk ve hibe eylediği vâki‘ ve sahîhadır bu husûsa şâhidleriz şehâdet dahi ederiz dediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâki‘ olup ol ki vâki‘ hâldir bi’t-taleb ketb ve zabt olundu. Tahrîren fî gurreti Zilhicceti’ş-şerîfe sene sitte ve elf. Şuhûdü’l-hâl: Es-Sâbikūn