Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 342 Hüküm no: 443 Orijinal metin no: [66a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âlime bt. Mustafa’nın askerî olduğu ve muhallefâtının askerî kassâm tarafından taksîm edilmesi gerektiği El-emru kemâ zükire fîhi harrerehû el-fakīr Abdülbâkī b. Mehmed el-Kadı bi asâkiri Rumeli. Ufiye anhümâ Medîne-i Hazret-i Ebî Eyyûbi el-Ensârî -aleyhi rahmetü’l-Bârî- mahallâtından Câmi‘-i Kebîr mahallesinde sâbıkan müteveffât olan Âlime bt. Mustafa nâm hâtunun vârisleri Sâliha bt. Hüseyin ve zevci el-Hâc Receb b. Emirşah tarafından vekîl-i şer‘îsi olan fahrü’l-eimme Abbas b. İbrahim meclis-i şer‘-i şerîfe gelip âti’z-zikr olan husûslarının üzerine varılıp mahallesinden tefahhus olunmasını taleb edip kıbel-i hâkim-i asâkirîden müstakil kassâm alınmasın [taleb] eyledikleri bâ‘isden fahrü’l-kuzât mevlânâ İshak Efendi ta‘yîn ve irsâl olundukda varıp medîne-i merkūmede zikr olunan câmi‘-i şerîfde akd-i meclis-i şer‘ edip bi’l-fi‘l mûmâ-ileyh Hazret-i Ebî Eyyûb müderrisi olan usvetü’l-muhakkikīn ve zübdetü’l-müdakkikīn yenbû‘ü’l-fazli ve’l-yakīn Mustafa Efendi eş-şehîr bi Nefeszâde ce‘ale’llâhu lehü’l-hüsnâ ve ziyâde ve hutebâ ve eimme ve sâir a‘yân ve eşrâfdan cem‘-i kesîr-i fuhûl ve cemm-i gafîr mine’l-udûl huzûrlarında merkūme Sâliha bi’l-asâle ve vekîl-i merkūm Abbas b. İbrahim bi’l-vekâle takrîr-i kelâm ve ta‘bîr ani’l-merâm kılıp müteveffât-ı merkūmenin verâseti mezbûre Sâliha ile zevci merkūm el-Hâc Receb’e münhasıra olup vâris-i kebîrleri olmağla merhûme-i merkūmenin muhallefâtı beynlerinde bi’t-terâzî taksîm ve tevzî‘ edip her biri hisselerine vâzı‘ü’l-yed olup mutasarrıflar iken hâlen Gabrova? kadısı cânibinden merhûme-i mezbûre sülüs vasiyyeti vardır deyû merkūm Receb yüzüne da‘vâ edip dahl ederler ma‘a hâzâ müteveffât-ı mezbûre askerîdir bu sebeble cemî‘ husûsunu hâkim-i askerî istimâ‘ eylemesin taleb ederiz deyû merhûmenin askerîliği bî-garaz müslümanlardan suâl ve tefahhus olunsun dediklerinde fi’l-vâki‘ husûs-ı mezbûr tefahhus olundukda umdetü’l-hutebâ Ramazan b. Mehmed ve fahrü’l-eimme Abdülkādir Halîfe b. Mehmed ve Mehmed b. Abdülkādir el-İmâm ve Muslihiddin b. Muzaffer el-İmâm ve türbedâr Kasım Halîfe b. Abdullah ve Mahmud b. Mehmed el-Hâfız ve sâir bî-garaz müslümanlar fi’l-hakīka müteveffât-ı merkūmenin babası Mustafa yevmî on sekiz akçe ile hâssa hayyâtîn zümresinden olup ve zevci el-Hâc Receb dahi yevmî üç akçe ile nefs-i İznik’de Eşrefüddin vakfı’nın berât-ı pâdişâhî ile mütevellîsi olup merhûme hem askerî kızıdır ve hem askerî taht-ı nikâhında iken fevt olup iki hamiyyetle askerîdir kısmeti ve sâir umûru âmmeten ve kâffeten askerîye müte‘allikdir deyû haber verdikleri bâ‘isden müteveffât-ı merkūmenin askerîliği zâhir ve bâhir olmağın vâki‘ hâli mevlânâ-yı mezbûr cem‘-i kesir huzûrlarında tahrîr edip ba‘dehû gelip meclis-i şer‘-i şerîfde haber vericek merkūme Sâliha ile mesfûr el-Hâc Receb’in muhallefât-ı müteveffât-ı mezbûreyi mukaddemâ beynlerinde bi tarîki’t-terâzî taksîm ve tevzî‘leri üzre ibkā ve mukarrer kılındı mâdâmki ba‘de’l-yevm âti’z-zikr olan sülüs vasiyyet husûsu hâkim-i askerî huzûrunda şer‘-i şerîf ile sâbit ve zâhir olmaya hâricden vech-i meşrûh üzre dahl olunmaya deyû ber sebîl-i temessük tahrîr olunup yed-i tâlibe def‘ olundu. Tahrîren fî evâhiri şehri Zilka‘de eş-şerîfe sene sitte ve elf mine’l-hicreti’n-nebeviyye. Şuhûd: Mevlânâ Hasan Halîfe b. Menteş, Mehmed Dede b. İvaz el-İmâm, el-Hâc (…) b. Mehmed el-askerî, Ebûbekir b. Abdülkādir el-İmâm, el-Hâc Mustafa b. Abdüllatif, Ahmed b. Abdullah, Mahmud b. Abdullah, Mustafa b. İskender er-Râcil ve gayruhüm mine’l-hâzırîn