Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 347 Hüküm no: 450 Orijinal metin no: [67a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râziye Hatun’un bülûğa erdiği ve reşid olduğu Husûs-ı âti’z-zikre bimâ hüve tarîkü’s-sübût zevcesi ve menkûhası Râziye Hâtun tarafından vekîl-i şer‘îsi olan zevci Receb Çavuş b. Abdullah mahfil-i kazâda bundan evvel mezbûre Râziye Hâtun’un vasiyy-i muhtârı olan fahrü’l-akrân Ali Kethüdâ b. Abdülmennân muvâcehesinde takrîr-i kelâm edip müvekkilem ve hâtunum mezbûr Râziye Hâtun hâlen sinn-i bülûğa vâsıl olmuşdur vasiyy-i mezbûr zabtında olan mâlını vekâletim hasebiyle taleb ederin dedikde gıbbe’s-suâl vasiyy-i merkūm Ali Kethüdâ mezbûre Râziye’nin rüşd ve bülûğunu inkâr ile cevâb vericek müdde‘î-i merkūmun müdde‘âsına muvâfık beyyine lâzım olmağın udûl-i müslimînden Hüseyin Bey el-Cündî ve mütevellî Mehmed Bey ve kâtib Mustafa Bey ve müezzin Hasan Halîfe kıbel-i şer‘den irsâl olundukda varıp mezbûre Râziye’den istifsâr-ı hâl eyleyip kendisi bi’z-zât rüşd ve bülûğa vâsıl olduğunu i‘tirâf eylediğinden mâ‘adâ civârında sâkin ehl-i vukūfdan suâl edip onlar dahi sinn-i bülûğa vâsıl olduğunu haber verdiklerini üslûb-ı muharrer üzre gelip hasm-ı câhid olan mezbûr Ali Kethüdâ muvâcehesinde takrîr ve tahkīk eylediklerinde ba‘de’t-ta‘dîli’ş-şer‘î şehâdetleri hayyiz-i kabûlde vâki‘ olmağın mâ vaka‘a gıbbe’t-taleb ketb ve zabt olundu. Tahrîren fî evâsıtı şehri Zilhicceti’ş-şerîfe sene sitte ve elf. Şuhûd: Es-Sâbikūn