Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 348 Hüküm no: 451 Orijinal metin no: [67b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Hüsam’ın câriyesini azat ettiği Mahmiye-i Galata hâricinde vâki‘ Müeyyedzâde mahallesi sâkinelerinden Fâtıma bt. Hüsam’ın ıtk-ı âti’z-zikri ikrâra Memi Reis b. Abdullah ve Mustafa b. Mehmed şehâdetleri ile vekâleti sâbite olan Mehmed b. Mahmud nâm kimesne mahfil-i kazâda işbu sâhibü’l-kitâb ve nâkilü’l-hitâbi’l-müstetâb orta boylu sağ ayağı aksak Bosneviyyü’l-asl Peymâne bt. Abdullah nâm câriye muvâcehesinde ikrâr-ı şer‘î kılıp müvekkilem mezbûre Fâtıma Hâtun bundan evvel mülkünde olan işbu mezbûre Peymâne’yi târih-i kitâbdan iki gün mukaddem hasbeten lillâh ve taleben li merzâti rabbiye’l-a‘lâ hâlis-i mâlından i‘tâk ve tahrîr eylemiş idi el-hâletü hâzihî vekâletim hasebiyle ben dahi ikrâr eyledim, ıtâknâmesi verilsin ba‘de’l-yevm sâir harâir-i asliyyât gibi [hürre] olup üzerinde mevâli için utekā üzerine lâzım olan hakk-ı velâdan gayrı şey yoktur deyicek gıbbe’t-tasdîki’ş-şer‘î vâki‘ hâl gıbbe’t-taleb ve’s-suâl ketb ve zabt olundu lede’l-hâce ihticâc edine. Tahrîren fî’l-yevmi’r-râbi‘ aşer min şehri Zilhicce sene sitte ve elf. Şuhûd: Süleyman b. Musa, Üstâd Sefer b. Abdullah, Ali b. Abdullah el-Bevvâb, Haydar el-Müezzin, Mehmed b. el-Hâc Memi el-Cündî, Hüsrev el-Muhzır ve gayruhüm