Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 360 Hüküm no: 468 Orijinal metin no: [70b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen kadının kocası Mahmud’un vasî Bekir’i ibrâ ettiği Hâssa topçular zümresinden Mahmud b. Abdullah nâm şahıs işbu sâhibü’l-kitâb Bekir Beşe b. Abdullah nâm râcil muvâcehesinde ikrâr-ı şer‘î ve i‘tirâf-ı mer‘î kılıp bundan akdem Ebülfazl mahallesinde fevt olan merhûme Ümmi bt. Abdullah nâm menkûhamın Bekir mezbûr Bekir vasiyy-i muhtârı oldum deyû otuz miskāl bir habbe altın bileziğini ve bir mâî köhne kaftanını ve bir münakkaş döşek yüzünü bî-vech alâkası yok iken kabz edip füruht etmiş imiş deyû da‘vâ eylediğimde merkūm Bekir Beşe ben müteveffât-ı merkūme Ümmi Hâtun’un vasiyy-i muhtârı idim ol vechile füruht edip müteveffât-ı mezbûrenin techîzine ve tekfînine harc ve sarf eyledim deyû cevâb verir idi el-hâletü hâzihî zikr olunan esbâbı fi’l-hakīka vasiyy-i muhtârı olduğum sebebden yine müteveffât-ı mezbûrenin techîz ve tekfînine harc ve sarf eylediğini mahalle-i mezbûre a‘yânı haber vermekle zimmetinde bir akçe kalmayıp vesâyeti dahi sahîha olduğuna ilm-i yakīn hâsıl oldu eyle olsa husûs-ı merkūma müte‘allik olan da‘vâdan zimmetini ibrâ-i âm ile ibrâ ve iskāt eyledim ba‘de’l-yevm mezbûr Bekir Beşe’den zevcem müteveffât-ı mezbûre Ümmi’nin muhallefâtına müte‘allik da‘vâ ve nizâ‘ edersem lede’l-hükkâm mesmû‘a ve makbûle olmaya deyicek mukırr-ı merkūmu mukarrun lehü’l-merkūm kelimât-ı meşrûhasında tasdîk ve tahkīk eylemeğin vâki‘ hâl gıbbe’t-taleb ve’s-suâl ketb ve zabt olundu. Tahrîren fî evâili Muharremi’l-harâm sene seb‘a ve elf. Şuhûd: Ahmed b. Mahmud, Mustafa b. Ali, İdris Çelebi b. Yusuf, Ahmed b. İsmail, Osman b. Hızır, Yunus b. Abdullah