Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 361 Hüküm no: 470 Orijinal metin no: [70b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vakıf parasının mütevellînin mirasçısından tahsil edildiği Sâbıkan kalafatçıbaşı olan merhûm Yunus’un vasîsi olup her sene hâsıl olan ribhi mahmiye-i Galata hâricinde merhûm-ı mezkûr binâ eylediği mescidin şem‘i ve sâir mühimmâtı için ta‘yîn olunan yedi bin akçenin meşrûtiyet üzre mütevellîsi olup vefât eden Meryem bt. Mustafa nâm hâtundan sonra nasb-ı tevliyyet re’y-i hâkime müfevvez idiğini müslümanlar ihbâr eylediklerinde vakf-ı mezbûra cânib-i şer‘-i kavîmden hasbiyyen mütevellî nasb ve ta‘yîn olunan işbu bâ‘is-i tahrîr-i kitâb Ahmed Reis b. Süleyman meclis-i şer‘de müteveffât-ı merkūmenin zevci Mustafa Kapudân b. Turgud mahzarında takrîr-i kelâm edip meblağ-ı vakfa merhûm-ı mezbûre Meryem’in hâl-i hayâtında mütevellîye olduğu cihetden makbûzu olup vefât etmekle üzerinde kalmışdı hâlen müteveffât-ı mezbûrenin verâseti merkūma münhasıra olup meblağ-ı mezkûr muhallefâtdan edâ olunmasın taleb ederim, suâl olunsun dedikde gıbbe’s-suâl mezkûr Mustafa Kapudân fi’l-vâki‘ zikr olunan yedi bin vakf akçe minvâl-i mastûr üzre müteveffât-ı merkūme üzerinde elân destres-i makbûzum olan muhallefâtdan edâ edeyin deyû mukır ve mu‘terif olacak mâ vaka‘a mezkûr mütevellî Ahmed Reis talebi ile tahrîr olundu. Tahrîren fî evâsıtı Safer min şühûri sene seb‘a ba‘de’l-elf. Şuhûd: Mustafa b. Abdullah el-İmâm, Ebûbekir b. Abdullah el-Bevvâbü’s-sultânî, Yahya Bey b. Abdullah er-Râcil, Mehmed Reis b. Mansur, Mustafa b. Sefer, Mehmed b. Sefer, Mehmed b. Hasan, Hüseyin b. Hasan, Ömer Reis b. Mehmed, Mehmed Reis b. Hasan, Mustafa b. Mahmud, Mehmed b. Mehmed, Tophâneli Abdi Reis, Ramazan b. Ömer, Musli b. Bâli ve gayruhüm Derkenâr: Bu hüccet kassâm-ı mezbûr Abdullah Efendi zamânında olup bu mahal beyaz kalmasın deyû bu semte kayd olundu.