Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 397 Hüküm no: 529 Orijinal metin no: [78b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Karşılıklı feshedilen bahçe satım sözleşmesi nedeniyle semenin iade edileceği Mehmed Çelebi b. Hasan nâm kimesne mahfil-i kazâda mahmiye-i Galata mahallâtından Bereketzâde mahallesi sâkinelerinden Zeyni Hâtun bt. Mustafa mahzarında takrîr-i kelâm edip bundan akdem mezbûre Zeyni Hâtun mahmiye-i mezbûre hâricinde vâki‘ Sarı Lütfi mahallesinde vâki‘ olup lede’l-ahâlî ve’l-cîrân ma‘lûmü’l-hudûd olmağla tahdîd [ve] tavsîfden müstağnî mülk bahçesini yetmiş bin nakd-i râyic fi’l-vakt akçeye bana bâtten bey‘ edip kabz-ı semen ve teslîm-i mebî‘ eyledikden sonra yine bahçeyi mezbûreden taleb ederim suâl olunsun dedikde mezbûre istintâk olunucak fi’l-vâki‘ hudûd-ı mezbûre ile mahdûd olan bahçemi mezbûr Mehmed Çelebi’ye semen-i merkūm ile mukaddemâ bey‘ etmiş idim ba‘dehû benim ile ikāle istemesi muhakkak olmağın bahçe-i merkūmeyi âhara bey‘ eyledim semen-i merkūm henüz zimmetimde mezbûra lâzımü’l-edâ deynimdir dedikde mâ hüve’l-vâki‘ alâ vukū‘ihî ketb ve tahrîr olunup tâlibi yedine vaz‘ olundu. Tahrîren fî evâhiri Saferi’l-muzaffer sene seb‘a ve elf. Şuhûd: Mehmed b. Abdullah, Ahmed b. (…), Cafer Bey b. Abdullah, Mehmed Çelebi b. Ferhad, Musa b. İshak, Mustafa Çelebi b. Ahmed, Sefer Reis b. Abdullah ve gayruhüm