Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 399 Hüküm no: 531 Orijinal metin no: [79b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sabiha bt. Hızır’ın miras payını aldığı Hâric-i Galata mahallâtından Surûrî mahallesinde bundan akdem vefât eden merhûm Osman’ın zevce-i metrûkesi Sabiha bt. Hızır nâm hâtun mahfil-i kazâda işbu bâ‘isü’l-hurûf müteveffâ-yı mezbûrun li ebeveyn karındaşı Yusuf Çelebi mahzarında ikrâr ve i‘tirâf edip müteveffâ-yı mezbûr zevcim Osman’ın muhallefâtından bana âid olan yedi bin yedi yüz doksan akçe sümün hisse-i şer‘iyyemi ba‘dehû vefât eden oğlum Mustafa’nın metrûkâtından intikāl eden on iki bin sekiz yüz yetmiş beş akçe sülüs hissemi mezbûr Yusuf Çelebi yedinden bi’t-tamâm alıp kabz eyledim min ba‘d husûs-ı mezbûra müte‘allik olan da‘vâdan mezbûr Yusuf’un zimmetini ibrâ eyledim ba‘de’l-yevm husûs-ı mezbûra müte‘allik benden veya vekîlimden merkūm Yusuf’un üzerine da‘vâ sâdıra olursa lede’l-hükkâmi’l-kirâm mesmû‘a olmaya dedikde mukırra-i mezbûrenin vech-i meşrûh üzre olan ikrârını mukarrun lehü’l-merkūm Yusuf Çelebi bi’l-muvâcehe tasdîk eyledikden sonra mâ hüve’l-vâki‘ tahrîr olunup yed-i tâlibe vaz‘ ve def‘ olundu. Tahrîren fî evâili Rebî‘ilevvel sene seb‘a ve elf. Şuhûdü’l-hâl: Mustafa Efendi b. Mehmed el-Kadı, Ahmed b. Ali el-İmâm, Beşir b. Hüseyin, Mustafa b. Nurullah er-Reisü’s-sultânî, Hasan b. Kasım, Ömer b. Hamza er-Reisü’s-sultânî, Hacı Veli b. İbrahim, Süleyman b. Musa, Nasuh b. Yusuf, Nasuh Reis b. Mustafa, Hacı er-Reisü’s-sultânî ve gayruhüm