Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 403 Hüküm no: 541 Orijinal metin no: [80b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe adlı çocuğa babasından intikal eden bazı gayrimenkullerin ninesi Hatice’ye kiraya verildiği Hâric-i Galata mahallâtından Surûrî mahallesi sâkinlerinden olup bundan akdem fevt ola[n] merhûm Osman’ın sagīre kızı Âişe’ye kıbel-i şer‘den vasî nasb olunan Yusuf Çelebi b. Mehmed mahfil-i kazâda sagīre-i mezbûrenin ceddesi olan Hatice bt. Ali mahzarında ikrâr edip sagīre-i merkūmenin mahalle-i mezbûrede vâki‘ inde’l-cîrân ma‘lûmü’l-hudûd olan menzilinden nısf hissesini yevmî bir buçuk akçeye ve mahmiye-i Kostantıniyye’de Tahtelkal‘a kurbunda vâki‘ haffâf dükkânının nısfını ve mahmiye-i Galata’da vâki‘ üç bâb haffâf dükkânından sülüs hissesini yevmî on iki akçeye cem‘an on üç buçuk akçe olur mezbûre Hatice’ye îcâre eyledim dedikde mukırra-i mezbûrenin vech-i meşrûh üzre olan ikrârını mukarrun lehe’l-merkūme Hatice bi’l-muvâcehe tasdîk eyledikden sonra tahrîr ve ketb olunup yed-i tâlibe vaz‘ ve def‘ olundu. Tahrîren fî evâsıtı şehri Rebî‘ilevvel sene seb‘a ve elf. Şuhûdü’l-hâl: Mustafa Efendi b. Mehmed el-Kadı, Ahmed b. Ali el-İmâm, Pîrî b. Hüseyin, Mustafa b. Nurullah er-Reisü’s-sultânî, Hasan b. Kasım, Ömer b. Hamza er-Reisü’s-sultânî, el-Hâc Veli b. İbrahim, Süleyman b. Musa, Nasuh b. Yusuf, Nasuh Reis b. Mustafa, el-Hâc er-Reisü’s-sultânî ve gayruhüm