Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 411 Hüküm no: 549 Orijinal metin no: [82a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa ve el-Hâc Ahmed’in İsa Çavuş’a olan kefâletlerinden kurtuldukları Sipâhi oğlanları zümresinden olup yirmi ikinci bölükden olan Mustafa Bey b. Hızır mahfil-i kazâda Mustafa b. Hızır ve el-Hâc Ahmed b. Ali nâm kimesneler mahzarlarında takrîr-i kelâm ve ta‘bîr-i merâm edip bundan akdem tersâne-i âmire çavuşlarından olan İsa Çavuş b. Mehmed dokuz yüz doksan beş târihinden yedi târihine varınca tersâne-i âmire mühimmâtıyçün Sakız mukāta‘asından yedi yük ve İzmir mukāta‘asından iki yük ve Karesi mukāta‘asından bir yük akçe kabz eyleyip beze ve kendire ve urgana sarf eylemeğin mezbûr çavuşun muhâsebesini görmeğe Defterdâr Efendi hazretleri tarafından ben havâle ta‘yîn olunduğumda mezbûrân Mustafa ve el-Hâc Ahmed merkūm çavuşun nefsine kefîl olmuşlar idi el-hâletü hâzihî merkūm çavuşun muhâsebesi görülüp zikr olunan meblağdan zimmetinde bir akçe ve bir habbe kalmamağın mezbûrların zimmeti kefâlet-i merkūmeden berî oldu dedikden sonra mezbûrân Mustafa ve el-Hâc Ahmed talebleriyle mâ hüve’l-vâki‘ alâ vukū‘ihî ketb ve tahrîr olunup yed-i tâlibe vaz‘ ve def‘ olundu. Tahrîren fî evâili Rebî‘ilâhir sene seb‘a ve elf. Şuhûd: Abdi Reis b. Ahmed, Ahmed Çavuş eş-şehîr bi Hammâmî, İbrahim Çelebi b. Mustafa el-Kâtib, Murad Reis b. Abdullah, Musli b. Ali el-Muhzır, Hüsrev b. Abdullah el-Muhzır ve gayruhüm