Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 412 Hüküm no: 551 Orijinal metin no: [82b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mükâtebe bedelinin bir kısmını ödeyen kölenin terekeye katılmasına itiraz ettiği Bundan akdem mahmiye-i Galata’da fevt olan Receb b. Nebi nâm kimesnenin abd-i memlûkü olan işbu orta boylu gök gözlü sarışın Rusiyyü’l-asl Yusuf b. Abdullah nâm gulâm mahfil-i kazâda müteveffâ-yı mezbûra kıbel-i şer‘den vasî olan Himmet Reis b. ( ) kimesne mahzarında takrîr-i kelâm edip müteveffâ-yı mezbûr efendim beni hâl-i hayâtında on bin akçe kitâbete kesip yedi bin akçesini hâl-i sıhhatinde kendiye teslîm edip üç bin akçe deynim kalmış iken mezbûr Himmet Reis beni sâir muhallefâtına ilhâk edip bey‘ etmek ister suâl olunsun dedikde gıbbe’s-suâl mezbûr Himmet Reis inkâr ile cevâb vericek mezbûr Yusuf’dan makālini musaddık beyyine taleb olundukda udûl-i müslimînden Veli Efendi b. ( ) ve Sâdık Reis b. Mustafa nâm kimesneler li ecli’ş-şehâde hâzırân olup fi’l-vâki‘ müteveffâ-yı mezbûr merkūm Yusuf’u hâl-i hayâtında on bin akçe kitâbete kesip yedi bin akçesini kendi kabz eyleyip mezbûr Yusuf’un zimmetinde üç bin akçe kalmışdır bu husûsa biz şâhidleriz şehâdet dahi ederiz dediklerinde şehâdetleri ba‘de’t-tezkiyye hayyiz-i kabûlde [vâki‘] oldukdan sonra mâ hüve’l-vâki‘ ketb ve tahrîr olunup yed-i tâlibe vaz‘ ve def‘ olundu. Tahrîren fî evâili Rebî‘ilâhir sene seb‘a ve elf. Şuhûd: El-Hâcı Mustafa b. Kara Ahî, Osman b. Mustafa, Sâdık Reis b. Mustafa, Veli Efendi el-Kadı, Müstecib Reis b. Nebi, İbrahim b. Mustafa