Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 416 Hüküm no: 556 Orijinal metin no: [83a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Çelebi’nin Abdi Reis’i ibrâ ettiği Mahmiye-i Galata’da Sultan Bayezid mahallesinde bundan akdem fevt olan mi‘mâr Mustafa Bey b. Abdullah nâm müteveffânın sulbî oğlu umdetü’l-emâcid ve’l-ekârim İbrahim Çelebi mahfil-i kazâda işbu hâmilü’l-kitâb Abdi Reis b. Sefer nâm kimesne mahzarında bi’t-tav‘ ve’r-rızâ ikrâr ve i‘tirâf edip mezbûr Abdi Reis müteveffâ babam mezbûr Mustafa’nın benim tarafımdan muhallefâtını füruht eylemiş idi el-hâletü hâzihî mezbûr Abdi Reis yedinden bana on sekiz bin iki yüz altmış sekiz akçe vâsıl olup meblağ-ı mezbûr on sekiz bin iki yüz altmış sekiz akçeyi mezbûr Abdi Reis yedinden bi’t-tamâm alıp ahz ü kabz eyledim ve bi’l-cümle mezbûr Abdi Reis füruht eylediği esbâba müte‘allik mezbûra da‘vâm yoktur dedikde mukırr-ı mezbûru vech-i meşrûh üzre olan ikrârında mezbûr Abdi Reis bi’l-muvâcehe tasdîk edicek mâ hüve’l-vâki‘ alâ vukū‘ihî ketb ve tahrîr olundu. Tahrîren fî evâsıtı şehri Rebî‘ilâhir sene seb‘a ve elf. Şuhûd: Ahmed Çavuş b. Hüseyin, Mahmud b. Kılıç, İsa Çavuş b. Mehmed, Derviş b. Ali, İbrahim b. Mustafa el-Kâtib, Mustafa b. Nurullah el-Kâtib, Musli b. Ali el-Muhzır, Hüsrev b. Abdullah el-Muhzır, el-Hâc Yusuf b. Abdullah, el-Hâc Mehmed b. Abdi, Mehmed Efendi el-Kadı eş-şehîr bi Bıçakçı