Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 417 Hüküm no: 558 Orijinal metin no: [83a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice’nin miras payını aldığı ve Selim Reis’in Ahmed Çavuş’u ibrâ ettiği Bundan akdem mahmiye-i Galata mahallâtından Yolcuoğlu mahallesinde fevt olan Âişe nâm hâtunun vâlidesi Hatice bt. ( ) nâm hâtun müteveffât-ı mezbûrenin ammisi Ahmed Çavuş b. Hüseyin mahzarında ikrâr edip mezbûre Âişe vefât eylediği zamân ben hacc-ı şerîfde olmak ile bana âid olanı mezbûr çavuş kabz eylemiş idi el-hâletü hâzihî müteveffât-ı mezbûrenin muhallefâtından ber vech-i tahmîn on bir bin akçe hakkım olup mezbûr çavuşun yedinden bi’t-tamâm alıp kabz eyledim zimmetinde bir akçe ve bir habbe hakkım kalmadı dediği bi’t-taleb kayd olundu. Yine mahalle-i mezbûrede sâkine müteveffât-ı mezbûrenin kızı Ümmühâni tarafından vekîl-i şer‘îsi olan zevci Selim Reis b. Beyce mezbûr çavuş mahzarında ikrâr edip bundan akdem müteveffât-ı mezbûrenin muhallefâtına müte‘allik birbirimiz ile da‘vâ sudûr eylemiş idi hâlen birbirimizi husûs-ı mîrâsa müte‘allik da‘vâdan zimmetini ibrâ eyledik dedikleri kayd olundu. Tahrîren fî evâili Rebî‘ilâhir sene sitte ve elf. Şuhûd: Abdi Reis b. Ahmed, Hüsrev b. Abdullah, Mehmed b. Yusuf, İbrahim b. Mustafa, el-Hâc Hasan b. Abdullah ve gayruhüm