Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 45 Hüküm no: 18 Orijinal metin no: [4b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Keyvan Ağa b. Abdülmennân’ın evin yarı hissesini sattığı Fahrü’l-emâsil ve’l-akrân Keyvan Ağa b. Abdülmennân mahfil-i kazâda fahrü’l-eşbâh Tersâne-i âmire reislerinden Abdi Reis b. Ali nâm kimesne muvâcehesinde bi’t-tav‘i’s-sâf ikrâr ve i‘tirâf edip mahmiye-i Galata hâricinde Kasımpaşa Câmi‘i mahallesinde bundan akdem vefât edip verâseti benim mu‘takam olmağın usûbet-i nesebiyye ile bana ve zevc-i metrûkü mûmâ-ileyh Abdi Reis’e münhasıra olan Gülizar bt. Abdullah muhallefâtından mahalle-i mezbûrede vâki‘ iki tarafı tarîk-i âmma ve bir tarafı Hamamcızâde mülküne ve bir cânibi Mehmed b. Ali mülküne ve bir cânibi yine mûmâ-ileyh Abdi Reis mülküne müntehî olup iki beyt-i ulvîyi ve altında bir mahzeni ve bir su kuyusunu ve muhavvatayı müştemil olan menzilin merhûme-i mezbûreden irs-i şer‘le bana intikāl eden nısf-ı şâyi‘ini cemî‘-i tevâbi‘ ve levâhıkıyla merhûme-i mezbûrenin zevci mûmâ-ileyh Abdi Reis’e on beş bin beş yüz nakid râyicü’l-vakt akçeye bey‘-i bâtt-ı sahîh-i şer‘î ile bey‘ edip meblağ-ı mezbûru mûmâ-ileyh Abdi Reis yedinden bi’t-tamâm ahz u kabz eyledim menzil-i mezbûrun nısfı verâseten ve nısfı şirâ-i şer‘î ile mülk-i mahz ve hakk-ı sırfıdır keyfe mâ yeşâ’ tasarruf eylesin dedikde mukırr-ı müşârün-ileyh Keyvan’ın vech-i meşrûh üzre sudûr eden ikrârını müşterî-i mûmâ-ileyh Abdi Reis vicâhen tasdîk ve şifâhen tahkīk eyledikde mâ vaka‘a gıbbe’t-taleb ketb olundu. Cerâ zâlike fî evâili Receb li sene hamse aşere ve elf. Şuhûdü’l-hâl: Şaban b. Sadullah, Müyesser b. Ahmed Çelebi, Mehmed Bey b. Abdullah, kazzâz Mahmud, Mahmud Efendi b. ( ) el-Kâtib, Mehmed b. Mustafa el-Kâtib, el-Hâc Mehmed b. Hasan, Cezerî Mehmed b. Abdullah, Murad Çavuş b. Abdullah, Perviz b. Abdullah ve gayruhüm