Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 50 Hüküm no: 28 Orijinal metin no: [6a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Mehmed Reis b. Mahmud’un muhallefâtının vasîye teslimi Mahmiye-i Galata hâricinde vâki‘ Kasımpaşa Câmi‘-i şerîfi mahallesi sâkinlerinden olup Donanma-yı hümâyûn seferinde umdetü’l-emâcid ve’l-ekârim Nasuh Kapudân b. İvaz nâm kimesnenin sefînesinde vefât eden el-Hâc Mehmed Reis b. Mahmud’un sulbî sagīr oğlu Mustafa’ya vasiyy-i muhtâr olan İbrahim Çelebi b. Mustafa nâm kimesne mahfil-i kazâda müşârün-ileyh Nasuh Kapudân mahzarında bi’t-tav‘i’s-sâf ikrâr ve i‘tirâf edip bundan akdem Donanma-yı hümâyûn seferinde müşârün-ileyh kapudânın sefînesinde mezbûr el-Hâc Mehmed fevt oldukda yanında mevcûd olan muhallefâtından bir kürdeyi ve bir mâî çuka yelek ve bir göcen kürklü ...? çukayı ve bir mor çuka tuman çakşırını ve bir müsta‘mel tülbenti ve bir fes takyesini ve bir tencereyi ve üç ...? donunu ve üç uçkuru ve bir münakkaş küçük makramayı ve bir bakır kahve ibriğini ve bir kuntranı çuka bornosu ve iki beyaz velenseyi ve bir köhne sofrayı ve bir küçük kaliçeyi ve bir mükemmel rahtı ile Cezâyir tüfengini ve bir kevgir kepçeyi ve bir câmedânı ve bir nısf tülbenti ve bir sahanı ve bir köhne zenbili ve içinde sikke-i harbiyye ile meskûke 26 guruş-ı kebîr bir sikke altın ve yüz fıddî Osmânî akçe ile memhûr bir keseyi zü’l-kadri’r-refî‘ ve’l-câhi’l-menî‘ sâhibü’l-izzi ve’l-iclâl sâhib-i ezyâli’l-mecd ve’l-ikbâl el-mahfûf bi sunûf-i avâtıfi’l-mülk el-müte‘âl Kapudân Cafer hazretleri cânib-i âlîlerinden müşârün-ileyh Nasuh Kapudân’a emânet vaz‘ olunmuş idi. Hâlen vesâyet-i mahkiyem hasebiyle kesesi ile meblağ-ı mezbûru ve zikr olunan esbâbın cümlesini müşârün-ileyh Nasuh Kapudân yedinden bi’t-tamâm ahz u kabz eyledim dedikde mâ vaka‘a gıbbe’t-taleb ve’t-tasdîk ketb olundu. Cerâ zâlike fî evâili Şa‘bân sene 1015. Şuhûdü’l-hâl: es-Sâbikūn fî hüccet-i vasiyy-i muhtâr