Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 51 Hüküm no: 30 Orijinal metin no: [6b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Karamürsel tipi gemideki ortaklık payının satışı Mahmiye-i Galata hâricinde Tophane’de Fındıklı nâm mevzi‘ kurbunda Hasan Çelebi mahallesi sâkinlerinden olup deryâ seferinde vefât eden merhûm el-Hâc Seyyid Şaban b. Ali nâm müteveffânın verâseti sagīr sulbî oğulları Şükrullah ve Mustafa ve Ali ve Mehmed ve kızları Âişe ve Hatice ve zevcesi Aynî Hâtun bt. Şaban’a münhasıra olup merhûm mezbûr el-Hâc Seyyid Şaban’ın karındaşı olup sıgār-ı mezbûrûnun vasiyy-i şer‘îleri olan el-Hâc Seyyid Mustafa b. Ali nâm kimesne işbu sâhibetü’l-kitâb mezbûre Aynî mahzarında bi’l-vesâye ikrâr ve i‘tirâf edip merhûm mezbûrun beyne’l-mellâhîn karamürsel denilmekle ma‘rûf olan sefînede olan nısf hisse-i şâyi‘ası ba‘de’l-vefât verese-i mezbûrûn beyninde kırk sehim kılınıp taksîm olundukda zikr olunan kırk sehimden beş sehmi mezbûre Aynî ve otuz beş sehmi sıgār-ı mezbûrûna intikāl eylemişdir. el-Hâletü hâzihî sıgār-ı mezbûrûna intikāl eden otuz beş sehim sefîne-i mezbûre-i köhne gark olursa eytâma zarar terettüb olmak ihtimâli kebîrü’l-vukū‘ olmağın min külli’l-vücûh eytâm için bey‘ enfa‘ olmağla bey‘ men yezîd kılınıp beyne’t-tâlibîn zikr olunan otuz beş sehim kirâren ve mirâren nidâ olunup sûk-ı sultânî cem‘an yirmi bir bin akçeye çıkdıkda rağabât-ı nâs müntefi‘a olup semen-i mezbûr ile merkūme Aynî üzerinde karâr etmeğin zikr olunan otuz beş sehmi cemî‘ âlât ve esbâbı ile merkūme Aynî’ye bey‘-i bâtt-ı sahîh-i şer‘î ile bey‘ edip kabz-ı semen-i mezbûr ve teslîm-i mebî‘-i merkūm eyledim ba‘de’l-yevm zikr olunan otuz beş sehim merkūme Aynî’nin mülk-i müşterâsıdır keyfe teşâ’ mutasarrıfe ola dedikde vasiyy-i mezbûrun ikrâr-ı meşrûhlarını merkūme Aynî bi’l-muvâcehe tasdîk edicek işbu vesîka ketb olundu. Cerâ fi’t-târihi’l-mezbûr. Şuhûdü’l-hâl: el-Hâc Ali b. Eyüb, el-Hâc Hayreddin b. Mahmud, Pîrî b. Abdullah, Seyyid Mehmed b. İsmail, Mustafa b. Mehmed, Mehmed b. Yusuf