Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 72 Hüküm no: 51 Orijinal metin no: [12a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Abdullah’ın müzâyededen evin kalan hisselerini aldığı Mahmiye-i Galata tevâbi‘inden kasaba-i Kasımpaşa’da Sürûri mahallesi sâkinlerinden olup donanma seferinde bundan akdem vefât eden Mehmed Reis b. Kasım’ın li üm karındaşı kızı min cihetin zevi’l-erhâm vârisesi olan Emine bt. Abdullah tarafından kızın âti’l-beyân hisse-i şer‘iyyesini bey‘a ve semenini kabza vekîl-i şer‘îsi olup vekâleti hasm-ı câhid mahzarında Mehmed Çelebi b. ( ) nâm kimesne ve Halil Bey b. İbrahim nâm kimesne şehâdetleri ile sâbit olan zümre-i râcilînden İbrahim Bey b. Mahmud nâm kimesne mahfil-i kazâda merhûm-ı mezbûrun zevce-i metrûkesi Emine bt. Abdullah mahzarında bi’t-tav‘ ve’r-rızâ ikrâr ve i‘tirâf edip merhûm-ı mezbûrun muhallefâtından mahalle-i mezbûrede vâki‘ olup hudûdunun bir cânibi tarîk-i âmma ve bir cânibi Sürûri Efendi vakfı’na ve bir cânibi el-Hâc Abbas b. Abdullah mülküne ve bir cânibi Garibzâde Hüseyin mülküne müntehî olup ve bir beyt-i süflîyi ve bir beyt-i ulvîyi ve bir su kuyusunu ve cüneyneyi ve kenîfi müştemil olan menzilin müvekkilem ile bi tarîki’l-hesâb zevce-i mezbûre beynlerinde irs-i şer‘le dört sehim olup bir sehmi zevce-i mezbûrenin hisse-i şer‘iyyesi ve üç sehmi müvekkilem mezbûre Emine’nin hisse-i şer‘iyyesi olmuş idi el-hâletü hâzihî merkūm-i mezbûrdan müvekkilem mezbûre Emine’ye intikāl eden zikr olunan dört sehimden üç sehmi bey‘ için sûk-ı sultânîde mezâd ve müzâyede olup mirâren ve kirâren mecâlis-i tâlibîne arz olundukda dört bin yedi yüz yirmi beş akçede zevce-i mezbûre üzerinde karâr edip meblağ-ı mezbûr hakkı karârı olup bir akçe ziyâde ile âhar tâlib ve râgıb olmamağın müvekkilemin hisse-i şer‘iyyesi olan zikr olunan dört sehimden üç sehmi vekâlet-i mahkiyem hasebiyle meblağ-ı mezbûr dört bin yedi yüz yirmi beş akçeyi zevce-i mezbûreye bey‘-i bâtt-ı sahîh-i şer‘î ile bey‘ edip teslîm-i mebî‘ ve kabz-ı semen-i mezbûr eyledim dedikde vekîl-i mezbûrun vech-i meşrûh üzre sudûr eden kelâmını zevce-i mezbûre vicâhen tasdîk ve şifâhen tahkīk eyledikde mâ vaka‘a gıbbe’t-taleb ketb olundu. Cerâ zâlike fî evâhiri Şa‘bân sene hamse aşere ve elf. Şuhûdü’l-hâl: Seyyid Murad b. Seyyid Şaban, İlyas Bey b. Abdullah, el-Hâc Abbas b. Abdi, Mustafa b. İbrahim er-Râcil, Pîrî b. Şaban, Mehmed Bey b. Hızır er-Râcil, Ali Bey b. İskender el-bevvâbü’s-sultânî, Ali b. Derviş el-Cündî, Mustafa b. Mehmed el-Muhzır, Mehmed b. Yusuf el-Muhzır ve gayruhüm