Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 71 Hüküm no: 50 Orijinal metin no: [11b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Câriye bedeli ile bazı malların bedelinin takas edildiği Mahmiye-i Galata’nın kule kapısı hâricinde Müeyyedzâde Câmi‘i şerîfi mahallesi sâkinlerinden olup bundan akdem tarîk-i hacda vefât eden Ahmed b. Mehmed nâm kimesnenin sin ve cüssesinin bülûğa tahammülü olup bülûğuna dahi mu‘terif olan sulbî oğlu Mehmed nâm emred mahfil-i kazâda merhûm-ı mezbûrdan irs-i şer‘le kendine intikāl eden muhallefâtını zabt ü kabza vasiyy-i muhtâr olan Yahya Bey b. Ahmed nâm kimesne mahzarında bi’t-tav‘ ve’r-rızâ ikrâr ve i‘tirâf edip mezbûr Yahya Bey senin silk-i mülkünde münselik orta boylu, kara gözlü, kara yağız, Eflakiyye Zemâne bt. Abdullah nâm câriyesini dokuz bin fıddî Osmânî akçeye iştirâ edip kabz ve tesellüm eyledim semeni olan meblağ-ı mezbûr dokuz bin akçeyi merkūm Yahya Bey ile vesâyet-i mahkiyesi hasebiyle zabt ü kabz eylediği emvâlimin dokuz bin akçesini takās eyledim dedikde mezbûr Mehmed’in vech-i meşrûh üzre sudûr eden ikrârını vasiyy-i mezbûr Yahya Bey de vicâhen tasdîk ve şifâhen tahkīk eyledi mâ vaka‘a gıbbe’t-taleb ketb olundu. Cerâ fî evâili şehri Ramazân sene hamse aşere ve elf. Şuhûdü’l-hâl: Hayrullah b. Habib, Mustafa b. Cafer el-bevvâbü’s-sultânî, el-Hâc Mustafa b. el-Hâc Sinan, Hasan b. Şükür er-Râcil, Mustafa b. Mehmed el-Muhzır, Hasan Bey b. İbrahim, Mehmed b. Yusuf el-Muhzır, Mehmed b. Mustafa ve gayruhüm