Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 74 Hüküm no: 53 Orijinal metin no: [12b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rıdvan Reis’e alacak iddiasının ispatı için mehil verilmesi Mahmiye-i Galata dâhilinde Yolcu oğlu mahallesi sâkinlerinden olup Donanma-yı hümâyûn seferinde bundan akdem vefât eden Bâli Reis b. Abdurrahman’ın sulbiye sagīre kızı Âişe’ye kıbel-i şer‘den mansûb vasî olan Ahmed Bey b. Abdüllatif nâm kimesne mahfil-i kazâda Tersâne-i âmire reislerinden Rıdvan Reis b. Abdullah nâm kimesne mahzarında takrîr-i da‘vâ edip mezbûr Rıdvan Reis merhûm-ı mezbûrun bir kıstı beş yüz doksan dört akçe hesâbı üzre bin yedi yüz seksen iki akçe üç ulûfe kıstını cânib-i mîrîden ve fevt oldukda yanında mevcûd olan iki yüz kırk üç akçe ki cem‘an iki bin yirmi beş ahz u kabz eylemiş meblağ-ı mezbûr iki bin yirmi beş akçe merhûm-ı mezbûrdan irs-i şer‘le sagīre-i mezbûreye intikāl etmişken vesâyet-i mahkiyem hasebiyle mezbûr Reis’den taleb ederim dedikde gıbbe’s-suâl mezbûr Rıdvan Reis bi’l-muvâcehe cevâbında fi’l-vâki‘ merhûm-ı mezbûrun bir kıstı beş yüz doksan dört akçe hesâbı üzre bin yedi yüz seksen iki akçe ulûfesini cânib-i mîrîden ve fevt oldukda yanında mevcûd olan iki yüz kırk akçesini emâneten cem‘an iki bin yirmi beş akçe eder ahz u kabz eyledim lâkin merhûm-ı mezbûrun zimmetinde iki bin yüz akçe hakkım vardır onun mukābelesinde ahz u kabz eyledim dedikde mezbûr Rıdvan Reis’den merhûm-ı mezbûrun zimmetinde iki bin yüz [13a] akçe hakkı var idiğine beyyine taleb olundukda mezbûr Rıdvan Reis beyyinem vardır lâkin şimdi hâzıra değildir deyip isbât-ı beyyineye istimhâl eyledikde mehl-i şer‘î verilip mâ vaka‘a gıbbe’t-taleb ketb olundu. Cerâ zâlike fi’l-yevmi’l-ışrîn min Şa‘bân sene hamse aşere ve elf. Şuhûdü’l-hâl: Mustafa b. el-Hâc Şaban, Mustafa Bey b. Abdullah, Mustafa b. Mehmed, Mehmed b. Yusuf el-Muhzıru’s-sultânî, Ferruh Bey b. Abdullah, Mehmed b. Hasan el-Müezzin, Ahmed b. Şaban