Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 83 Hüküm no: 69 Orijinal metin no: [16a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice Hâtun bt. Mehmed’in Mustafa Bey ve Mehmed Bey ile mîrâs davasında sulh olduğu Mahmiye-i Galata hâricinde vâki‘ Yazıcı mahallesinde müteveffâ Receb b. Mahmud nâm kimesnenin zevce-i metrûkesi Hatice Hâtun bt. Mehmed mahfil-i kazâda müteveffâ-yı mezbûrun kebîr oğlu Mehmed Bey ve sagīrleri Ali ve Mustafa ve sagīresi Sâliha’nın vasiyy-i şer‘îsi olan Mustafa Bey b. Mehmed mahzarlarında ikrâr ve i‘tirâf edip merhûm müteveffânın mahalle-i mezbûrede vâki‘ hudûdunun bir tarafı İshak Efendi mülkü ve bir tarafı Üstâd Mehmed mülkü ve bir tarafı Hüseyin Bey mülkü ve bir tarafı tarîk-i âm ile mahdûd mülk menzilinden bana sümün hissem için üç bin yedi yüz elli akçe zuhûr edip meblağ-ı mezbûru merkūmân Mustafa Bey ile Mehmed Bey yedlerinden alâ sebîli’t-tehârüc alıp kabûl ve kabz edip husûs-ı mezbûra müte‘allik da‘vâ ve nizâ‘ım kalmamışdır ba‘de’l-yevm benden asâleten ve vekâleten da‘vâ sudûr eder ise lede’l-hükkâmi’l-kirâm mesmû‘ ve makbûl olmaya dedikde mukırra-ı mezbûrenin vech-i meşrûh üzre olan ikrârını merkūmân Mustafa Bey ve Mehmed Bey bi’l-muvâcehe tasdîk eylediklerinde tarafeynin ikrâr ve tasdîkleri gıbbe’t-taleb ber mûceb-i temessük ketb olundu. Tahrîren fî evâsıtı şehri Receb sene hamse aşere ve elf. Şuhûdü’l-hâl: Mustafa Bey [b.] Mehmed, Mehmed [b.] Yusuf, el-Hâc Rıdvan [b.] Abdullah, Ali [b.] Mehmed el-İmâm, Mustafa Çelebi b. Ali el-Müezzin, Üstâd Süleyman [b.] Abdullah, Üstâd Ramazan [b.] Mustafa