Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 84 Hüküm no: 70 Orijinal metin no: [16b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beytülmâle ait evdeki hisselerin müzâyedede satıldığı Mahmiye-i Galata kazâsında emîn-i beytülmâl olan fahrü’l-ümenâ Mahmud Çavuş b. Ahmed nâm kimesne mahfil-i kazâda mahmiye-i mezbûre tevâbi‘inden kasaba-i Beşiktaş’da bundan akdem Ekmekçibaşı mahallesinde vefât eden Dede Bey demek ile ma‘rûf Ali Bey b. Pîrî nâm cündînin zevce-i metrûkesi Peymâne bt. Abdullah nâm hâtun mahzarında bi’t-tav‘ ve’r-rızâ ikrâr ve i‘tirâf edip zâhirde zevce-i mezbûreden gayrı vâris-i ma‘rûfu olmamağın merhûm mezbûrun muhallefâtından mahalle-i mezbûrede vâki‘ iki beyt-i ulvî ve üç beyt-i süflîyi ve bir kileri ve eşcâr-ı müsmireyi müştemil cüneyneyi hâvî olup hudûdunun iki cânibi Tekerlek Mustafa bahçesine ve iki cânibi tarîk-i âmma müntehî olan menzilin rub‘u zevce-i mezbûreye ve selâse erbâ‘ı beytülmâl-i mezbûra âid olmuş idi hâlâ beytülmâl-i mezbûra olan menzil-i mezbûrun selâse erbâ‘ı bey‘ için sûk-ı sultânîde mirâren ve kirâren bey‘ men yezîd olup mecâlis-i tâlibîne arz olundukdan sonra beş bin üç yüz yirmi beş akçede karâr edip meblağ-ı mezbûr hakk-ı karârı olup bir akçe ziyâde ile âhar tâlib ve râgıb olmamağın menzil-i mezbûrun beytülmâl-i mezbûra âid olan selâse erbâ‘ını meblağ-ı mezbûr beş bin üç yüz yirmi beş akçeye mezbûre Peymâne’ye bey‘-i bâtt-ı sahîh-i şer‘î ile bey‘ edip meblağ-ı merkūm beş bin üç yüz yirmi beş akçeyi mezbûre Peymâne yedinden bi’t-tamâm ahz u kabz edip teslîm-i mebî‘ eyledim dedikde emîn-i müşârün-ileyhin vech-i meşrûh üzre sudûr eden kelâmını merkūme Peymâne vicâhen tasdîk ve şifâhen tahkīk eyledikde mâ vaka‘a gıbbe’t-taleb ketb olundu. Cerâ zâlike ve hurrire fî evâili Şevvâl sene hamse aşere ve elf. Şuhûdü’l-hâl: Murad Ağa b. Abdullah, Memi Ağa b. Abdullah, İbrahim b. Hüdâverdi, Yusuf Ağa b. Abdullah, Ali Bey b. Abdullah, Ahmed Bey b. Abdüllatif, Ali Bey b. İskender, İskender b. Abdullah, Mehmed b. Yusuf el-Muhzır, Mehmed Bey b. Ali el-Cündî, sütçü Ali, Mehmed Çelebi b. Şehabeddin el-Mütevellî, Mustafa b. Mehmed el-Muhzır ve gayruhüm