Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 85 Hüküm no: 72 Orijinal metin no: [17a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Hâtun bt. el-Hâc Ali’nin mehir alacağı Mahmiye-i Galata hâricinde vâki‘ Mustafa Ağa mahallesi imâmı Murad Halîfe b. Abdullah ve mahalle-i mezbûre müezzini Ali b. Hasan nâm kimesneler meclis-i şer‘de hâzırân olup, hâl-i hayâtında mahmiye-i Galata hâricinde vâki‘ Süheyl Bey mahallesinde sâkin iken denizde boğularak vefât eden merhûm el-Hâc Mustafa b. Şaban’ın Mehmed nâm sagīr oğluna ve Kamer ve Asiye nâm sagīre kızlarına kıbel-i şer‘den mansûb vasî olan ve husûs-ı âti’l-beyânı inkâr eden hasm-ı câhid Pîrî b. Abdi nâm kimesne mahzarında, merhûm-ı mezbûrun zevce-i metrûkesi ve kendisinin de kızı olan Âişe Hâtun nâm hâtun kıbelinden âti’z-zikr mehr-i müeccelinin isbâtına vekâleti nehc-i şer‘î üzre sâbit olan hâmil-i hâze’l-kitâb Solak el-Hâc Ali b. ( )’den bi’l-vekâle sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, merhûm-ı mezbûrun zimmetinde, müvekkile-i mezbûre Âişe Hâtun’un nikâhı esnâsında ma‘kūd-i aleyh olan mehr-i müecceli cihetinden râyicü’l-vakt on bin akçe hakkı vardır. Zevce-i mezbûreye meblağ-ı mezbûru merhûm-i mesfûrdan tamâmen veya kısmen, asâleten veya vekâleten almadığına, bi vechin mine’l-vücûh ve sebebin mine’l-esbâb zimmetini ibrâ etmediğine dâir yemîn verilmesinden sonra şehâdetleri ba‘de şerâiti’l-kabûl inde’ş-şer‘ mu‘teber ve makbûl olmağın hâkim şehâdetleri mûcebince hükm etti. Cerâ zâlike ve hurrire fî evâili Zilka‘deti’ş-şerîfe sene hamse aşere ve elf. Şuhûdü’l-hâl: Ahmed Reis b. Eyüb, Mustafa b. Abdi, Ramazan b. Yusuf, Allahverdi b. Mehmed, Mehmed b. Mustafa ve gayruhüm