Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 94 Hüküm no: 86 Orijinal metin no: [20a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âmine bt. Mehmed lehine iddet nafakasına hükm edilmesi Mahmiye-i Galata dâhilinde Yolcu oğlu mahallesi sâkinelerinden Âmine bt. Mehmed nâm hâtun meclis-i şer‘-i şerîfde Ferruh Bey b. Abdullah nâm cündî mahzarında takrîr-i da‘vâ edip bundan esbak zümre-i mellâhînden zevcim Hasan b. Hüseyin nâm kimesne kasaba-i İznikmid’e gittikde ben târih-i kitâb Recebi’nin gâyetine gelir isem zevcim mezbûr Âmine benden talâk-ı bâyin ile mutallaka olsun ve nafaka-i iddeti dahi benim vekîlim olup veresin diye mezbûr Ferruh Bey nafaka-i iddetimi bana teslîm etmeğe vekîl eyledi târih-i mezbûr mürûr edip ve ben talâk-ı mezbûr ile mutallaka olmuşdum nafaka-i iddetimi vekîl-i mezbûrdan taleb ederim dedikde gıbbe’s-suâl vekîl-i mezbûr husûs-ı merkūmu bi’l-külliye inkâr ile cevâb verdikde merkūme Âmine’den vech-i meşrûh üzre da‘vâsına mutâbık beyyine taleb olundukda udûl-i müslimînden Mehmed b. Hasan ve diğer Mehmed b. Ali nâm kimesneler li ecli’ş-şehâde mahfil-i kazâya hâzırân olup fi’l-vâki‘ mezbûr Hasan kasaba-i mezbûreye gittikde bu târih-i kitâb Recebi’nin gâyetine gelmezsem benim zevcem mesfûre Âmine benden talâk-ı bâyin ile mutallaka olsun sen benim vekîlim olup nafaka-i iddetimi mezbûre Âmine’ye veresin diye bizim huzûrumuzda mezbûr Ferruh Bey’i vekîl eyledi bu husûsa biz şâhidleriz şehâdet dahi ederiz diye edâ-i şehâdet-i şer‘iyye ettiklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâki‘ olup mâ vaka‘a bi’t-taleb kaydolundu. Tahrîren fî evâili Zilka‘de sene hamse aşere ve elf. Şuhûdü’l-hâl: Ahmed Bey b. Abdüllatif, Mehmed b. Yusuf, Mustafa b. Mehmed el-Muhzır, Mustafa b. Süleyman ve gayruhüm