Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 96 Hüküm no: 88 Orijinal metin no: [20b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beytülmâle intikal eden evdeki beytülmâl payının satılması ve takas beyânı Mahmiye-i Galata’da emîn-i beytülmâl olan fahrü’l-ümenâ Murad Çavuş b. Abdürrahim nâm kimesnenin kâtibi ve husûs-ı âti’l-beyâna vekîl-i şer‘îsi olup vekâleti nehc-i şer‘î üzre sâbite olan Ali Çelebi b. Mustafa nâm kimesne mahfil-i kazâda Topkapısı hâricinde Emânî Çelebi mahallesinde bundan akdem vefât eden Kasım b. Abdullah nâm kimesnenin zevce-i metrûkesi ve vârisesi Kamer bt. Abdullah nâm hâtun mahzarında bi’t-tav‘i’s-sâf ikrâr ve i‘tirâf edip müteveffâ-yı mezbûr Kasım’ın zevcesi mezbûre Kamer’den gayrı zâhirde vâris-i ma‘rûfu olmayıp muhallefâtının selâse erbâ‘ı beytülmâl-i mezbûra ve rub‘u zevcesi mezbûre Kamer hâtuna âid olmağın müteveffâ-yı mezbûrun muhallefâtından mahalle-i mezbûrede vâki‘ bir tarafdan Dilsiz Çerkez İsmail Ağa ve bir tarafdan Mustafa Çelebi mülkleri ile ve bir tarafdan tarîk-i âm ile mahdûd olup iki beyt-i süflîyi ve bir beyt-i ulvîyi ve bir su kuyusunu ve bir sofayı ve fırını ve kenîfi ve eşcâr-ı müsmire ve gayr-ı müsmireyi müştemile hadîkayı hâvî menzil sûk-ı sultânîde bey‘ olunmak için mirâren ve kirâren müddet-i medîde mezâd olunup mecâlis-i tâlibîne arz olundukda on bin akçede mezbûre Kamer hâtunun üzerinde karâr edip bir akçe ziyâde ile âhar tâlib ve râgıb olmamağın [21a] menzil-i mezbûrun beytülmâle âid olan selâse erbâ‘ı vekâleti mahkiyem ve kitâbetim hasebiyle mezbûre Kamer hâtuna yedi bin beş yüz akçeye bey‘-i bâtt-ı sahîh-i şer‘î ile bey‘ edip semeni olan yedi bin beş yüz akçesini mezbûre Kamer hâtunun müteveffâ-yı mezbûrun zimmetinde karz-ı şer‘îden olan sekiz bin akçe deyninin altı bin akçesine takās olunup bâkī bin beş yüz akçeyi mîrî için mezbûre Kamer yedinden aldım kabz eyledim dedikde mukırr-ı mezbûr Ali Çelebi’nin ber vech-i meşrûh sudûr eden ikrârını mukarrun lehâ’l-merkūme Kamer vicâhen tasdîk edicek mâ vaka‘a bi’t-taleb ketb olundu Tahrîren fî evâili Zilka‘de sene hamse aşere ve elf. Şuhûdü’l-hâl: Ahmed b. Osman, Ömer b. Ali, Mustafa b. Yusuf, Mustafa b. Mehmed, Mehmed b. Yusuf