Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 99 Hüküm no: 93 Orijinal metin no: [22a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Efendi b. Abdülaziz’in ipek bahâsından borcu olduğu Osman Çelebi b. Abdülaziz nâm kimesne mahfil-i kazâda mahmiye-i Galata tevâbi‘inden Tophane’de Hoca Ali mahallesi sâkinlerinden olup vilâyet-i Rumeli’nde Prevadi nâm kasabada bundan akdem vefât eden merhûm-i mebrûr Yusuf Efendi b. Abdülaziz’in zevce-i metrûkesi olup ba‘zı muhallefâtına vâzı‘atü’l-yed olan fahrü’l-muhadderât Sâliha Hâtun bt. Mehmed’in husûs-ı âti’l-beyâna vekîl-i şer‘îsi olup hasm-ı câhid mahzarında Mahmud b. İsa ve İsmail Halîfe b. Abdi el-İmâm şehâdetleri ile vekâleti sâbite olan fahrü’l-eşbâh Behrâm Bey b. Abdullah nâm kimesne mahzarında takrîr-i da‘vâ edip merhûm-ı mezbûr Yusuf Efendi’nin zimmetinde beynimizde ilm-i şer‘î ile ma‘lûm harîr bahâsından sekiz bin fıddî Osmânî akçe hakkım vardır muhallefâtından taleb ederim dedikde gıbbe’s-suâl vekîl-i mezbûr Behrâm Bey bi’l-muvâcehe cevâbında da‘vâ-yı mezbûreyi bi’l-külliye inkâr ettikde mesfûr Osman Çelebi’den da‘vâ-yı mezbûresine muvâfık beyyine taleb olundukda udûl-i müslimîn ve ahrâr-ı muvahhidînden Nebi b. Mehmed ve Mehmed b. Osman nâm kimesneler li ecli’ş-şehâde mahfil-i kazâya hâzırân olup gıbbe’l-istişhâdi’ş-şer‘î edâ-i şehâdet-i şer‘iyye edip merhûm Yusuf Efendi hâl-i hayâtında ve kemâl-i akl ve sıhhatinde bizim huzûrumuzda mezbûr Osman Çelebi’ye beynimizde ilm-i şer‘î ile ma‘lûm harîr bahâsından sekiz bin akçe deynim vardır diye ikrâr eyledi bu husûsa şâhidleriz şehâdet dahi ederiz diye edâ-i şehâdet-i şer‘iyye eyleyip ba‘de’t-ta‘dîl ve’t-tezkiyye şehâdetleri hayyiz-i kabûlde vâki‘ olmağın mâ vaka‘a gıbbe’t-taleb ketb olundu. Cerâ zâlike ve hurrire fî evâili Zilka‘de sene hamse aşere ve elf. Şuhûdü’l-hâl: Seyyid Yahya b. Seyyid Hasan, Mehmed Çelebi b. Cafer Bey er-Reis es-sultânî, Mahmud b. Mehmed el-İmâm, fahrü’l-eimme Mustafa Efendi b. Abdülaziz, Mehmed b. Mustafa, Mehmed b. Mustafa el-Kâtib ve gayruhüm