Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 113 Hüküm no: 108 Orijinal metin no: [27b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Abdullah’tan intikal eden evdeki hisse satışı Mahmiye-i Galata’da Tophane kapısı dâhilinde Sultan Bayezid mahallesinde bundan akdem vefât eden merhûm Mustafa b. Abdullah’ın sulbiye kızı Râbia’nın hâlâ zevci ve bey‘-i âti’l-beyâna ve semenini vech-i âtî üzre takāsa vekîl-i şer‘îsi olup vekâlet-i nehc-i şer‘î üzre sâbite olan Ahmed Halîfe b. Mustafa nâm kimesne meclis-i şer‘de merhûm-ı mezbûrun zevce-i metrûkesi ve vârisesi Âbide bt. Abdullah’ın hâlâ zevci ve ikrâr-ı âti’l-beyânı tasdîke vekîl-i şer‘î olup vekâleti Şükrullah Efendi b. Ali ve Mehmed Efendi b. Mustafa şehâdetleri ile sâbite olan Mahmud b. Ahmed nâm kimesne mahzarında bi’t-tav‘i’s-sâf ikrâr ve i‘tirâf edip merhûm mezbûr Mustafa fevt olup verâseti zevcesi müvekkile-i mezbûre Âbide’ye ve sulbiye kızı mesfûre Râbia’ya ve diğer sulbiye kızı Sultana ve Sâliha’ya münhasıra olup ba‘dehû kable’l-kısmet mesfûre Sultana dahi vefât edip verâseti mezbûre Âbide’ye ve li ebeveyn kız karındaşları mezbûretân Râbia ve Sâliha’ya münhasıra olup kable’l-kısmet mezbûre Sâliha dahi vefât edip verâseti anası mezbûre Âbide’ye ve li ebeveyn kız karındaşı merkūme Râbia’ya münhasıra olup merhûm-ı mezbûr Mustafa’nın muhallefâtından mahmiye-i mezbûrede vâki‘ iki bâb fevkānî odayı ve bir bâb tahtânî odayı ve bir tahtapûşu ve bir su kuyusunu ve bir musluğu ve bir kenîfi hâvî olup hudûdunun iki cânibi tarîk-i âmma ve bir cânibi Ermeni Yavanos mülküne ve bir cânibi İbrahim Çelebi mülküne müntehî olan menzil verese-i mezbûre beynlerinde münâsaha tarîkiyle altı yüz sehim olup bu altı yüz sehimden münâsaha tarîkiyle mezbûre Râbia’ya babası merhûm-ı mezbûr Mustafa’dan intikāl eden yüz yetmiş beş sehim hisse-i şer‘iyyesini ve li ebeveyn kız karındaşı mezbûre Sultana’dan intikāl eden yetmiş sehim hisse-i şer‘iyyesini ve diğer li ebeveyn kız karındaşı mezbûre Sâliha’dan intikāl eden elli sehim hisse-i şer‘iyyesini mezbûre Râbia’nın cem‘an iki yüz doksan beş sehim hisse-i şer‘iyyesini anası mezbûre Âbide’ye vekâlet-i mahkiyem hasebiyle sekiz bin altı yüz kırk akçeye bey-i bâtt-ı sahîh-i şer‘i ile bey‘ edip meblağ-ı mezbûr sekiz bin altı yüz kırk akçeyi müvekkile-i mezbûre Râbia’nın zimmetinde anası mezbûre Âbide’ye olan sekiz bin altı yüz akçe deyn-i nafakasına takās eyledim [28a] dedikde vekîl-i mûmâ-ileyh Ahmed Halîfe’nin vech-i meşrûh üzre sudûr eden kelâmını vekîl-i mesfûr Mehmed Bey vekâleten vicâhen tasdîk ve şifâhen tahkīk eyledikde mâ vaka‘a gıbbe’t-taleb ketb olundu. Cerâ fî evâhiri Zilhicce sene hamse aşere ve elf. Şuhûdü’l-hâl: Pervâne b. Abdullah, Mustafa b. Abdullah el-Hayyât, Şükrullah b. el-Hâc Mehmed, Beyti Bey b. İsmail, Derviş b. Mustafa, Hüseyin b. Mehmed el-ma‘rûf bi Arabzâde, Mustafa b. Mehmed el-Muhzır, Mehmed b. Yusuf el-Muhzır ve gayruhüm