Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 112 Hüküm no: 107 Orijinal metin no: [27b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rabia Hâtun bt. Mustafa’nın açtığı istihkak davasında delil ikâmesinden aczi ve davalıya yemîn verilmesi Mahmiye-i Galata dâhilinde Sultan Bayezid Han aleyhi’r-rahmetü ve’r-rıdvân mahallesi sâkinlerinden fahrü’l-muhadderât Râbia Hâtun bt. Mustafa nâm hâtunun zevci ve husûs-ı âti’l-beyâna vekîl-i şer‘îsi olup vekâleti nehc-i şer‘î üzre sâbite olan fahrü’l-eimme Ahmed Halîfe b. Muharrem nâm kimesne mezbûre Râbia’nın vâlidesi Âbide bt. Abdullah nâm hâtunu meclis-i şer‘-i şerîfe ihzâr ve mahzarında bi’l-vekâle takrîr-i da‘vâ edip bundan akdem müvekkile-i merkūme Râbia’nın babası merhûm-ı mezbûr Mustafa fevt oldukda muhallefâtından bir istikan ve bir sorguç ve bir altın bilezik ve beş aded tesbih inciyi merkūme Âbide Hâtun ahz u kabz edip hâlâ yedindedir eşyâ-i mezkûreden mezbûre Râbia’nın hisse-i şer‘iyyesin taleb ederim suâl olunsun dedikde gıbbe’s-suâl merkūme Âbide Hâtun eşyâ-i mezkûreyi bi’l-külliye inkâr edip vekîl-i mezbûr Ahmed Halîfe’den da‘vâsına mutâbık beyyine taleb olundukda ikāmet-i beyyineden âciz ve kāsır olup vekîl-i merkūm Ahmed Halîfe talebi ile zikr olunan eşyâyı ahz u kabz etmediğine mezbûre Âbide’ye yemîn teklîf olundukda yemîn-i billâhi’l-aliyyi’l-a‘lâ edicek mâ hüve’l-vâki‘ bi’t-taleb ketb olundu. Tahrîren fî evâsıtı Zilhicce sene hamse aşere ve elf. Şuhûdü’l-hâl: Abdürrahim Efendi b. Mehmed, Mehmed Efendi b. Mustafa, Şükrullah Efendi [b.] İbrahim, Mustafa [b.] Süleyman, Mehmed b. Yusuf ve gayruhüm