Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 118 Hüküm no: 118 Orijinal metin no: [29b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vesâyet gereği evin kullanıldığının anlaşılması Mahmiye-i Galata müzâfâtından kasaba-i Kasımpaşa mahallâtından Sürûri mahallesi sâkinlerinden olup bundan akdem vefât eden Âmine bt. Mustafa nâm hâtunun sadrî oğlu Mehmed’in ve sadriyye kızı Âişe’nin babası fahrü’l-eşbâh Hüseyin Bey b. Yakub meclis-i şer‘-i şerîfde Kamer bt. Osman nâm hâtun mahzarında takrîr-i da‘vâ edip merhûme-i merkūme Âmine’nin muhallefâtından mahalle-i mezbûrede vâki‘ bir tarafı Veli b. Abdullah ve bir tarafı mezbûre Kamer Hâtun mülkleri ile ve iki tarafı tarîk-i âm ile mahdûd olup bir beyt-i süflîyi ve zulleyi ve muhavvatayı ve eşcâr-ı müsmireyi müştemil hadîkayı hâvî olan menzili müteveffât-ı merkūme Âmine, Hani bt. Yahya nâm hâtundan beş bin üç yüz akçeye iştirâ edip mülk-i müşterâsı olup fevt olmağla sagīrân-ı mezbûrâna intikāl etmiş idi hâlâ mezbûre Kamer menzil-i mezbûru fuzûli tasarruf eder suâl olunup kasr-ı yed ettirilmesin taleb ederim dedikde gıbbe’s-suâl mezbûre Kamer cevâb verip fi’l-vâki‘ menzil-i mezbûr müteveffât-ı merkūmenin mülk-i müşterâsı olup fevt olmağla sagīrân-ı mezbûrâna intikāl etti lâkin benim tasarrufum sagīrân-ı mezbûrânın emvâl ve erzâkını zabt için kıbel-i şerden vasî nasb olunmuş idim vesâyetim hasebiyle sagīrân-ı mezbûrân için zabt ederim dedikde mâ vaka‘a ketb olundu. Şuhûdü’l-hâl: Ahmed b. Hasan, Mehmed b. Mehmed, Ahmed b. Mehmed, Mehmed b. Bâli, Ömer b. Mehmed ve gayruhüm