Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 119 Hüküm no: 119 Orijinal metin no: [30a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Evin bey‘ bi’l-istiğlâl ile Merhûm Kemal Vakfı’na satıldığı Hâl-i hayâtında hâric-i mahmiye-i Galata mahallâtından Kasımpaşa Câmi‘i mahallesinde sâkin iken bundan akdem Akdeniz donanması seferinde vefât eden el-Hâc Mehmed’in Mustafa nâm sagīr oğlunun vasiyy-i muhtârı olan fahrü’l-eşbâh İbrahim Çelebi b. Mustafa ve ayrıca merhûm-ı mezbûrun Âmine ve Hatice nâm kızları ve vârisleri kıbelinden ve yine ayrıca merhûm-i mesfûrun zevcesi ve vârisi olan Âişe bt. Abdullah adlı hanımlar tarafından nehc-i şer‘î üzre bey‘ ve îcâra vekâleti sâbit olan fahrü’l-emâsil ve’l-akrân vekîl Hasan Çavuş b. Abdullah nâm kimesne meclis-i şer‘-i şerîfde, sagīr-i mezbûr ile müvekkilân-ı merkūmân arasında müşterek mülk olan ve irs-i şer‘le merhûm-ı mezbûrdan kendilerine intikāl eden mahalle-i mezkûrede vâki‘ iki bâb tahtânî ve üç bâb fevkānî beyti, hamamı, su kuyusunu, helâyı, meyveli ve meyvesiz ağaçları müştemil bahçeyi hâvî ve bir tarafdan Üstâd Hasan b. Abdullah mülkü, diğer tarafdan reis-i sultânî Mustafa b. Abdullah mülkü, öbür tarafdan Mesih b. Abdullah mülkü ve diğer tarafdan da tarîk-i âm ile mahdûd cemî‘ menzili, îcâb ve kabûl ile teslîm tesellümü hâvî bey‘ ü şirâ ile râyicü’l-vakt altmış bin akçe-i Osmânî semen-i mu‘ayyen-i makbûzla vesâyeten ve vekâleten bi tarîki’l-istiğlâl hâmil-i hâze’l-kitâb merhûm Kemal evkāfı mütevellîsi umdetü’l-muhakkıkīn Cafer Efendi b. Mahmud’a bey‘ ettiklerini ikrâr ve i‘tirâf ettiler. O da vakf-ı mezbûr malıyla menzili bey‘ bi’l-istiğlâl ile onlardan iştirâ etti. Gıbbe’t-tahliyye ve’t-tekābuz sagīr-i mezbûra ve müvekkilân-ı merkūmâna vekâlet ve vesâyeti hasebiyle menzili bir seneliğine altı bin akçe ücret-i kirâ ile icâreye almak istemesi üzerine mütevellî menzil-i mezbûru icâreye verdi. Cerâ zâlike ve hurrire fî gurreti Muharremi’l-harâm sene sitte aşere ve elf. Şuhûdü’l-hâl: Mehmed Efendi [b.] Mustafa, Abdülkerim Çelebi [b.] Mehmed, Şükrullah Çelebi [b.] İbrahim, Mustafa b. Süleyman, Mustafa [b.] Mehmed, Mehmed b. Yusuf ve gayruhüm