Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 122 Hüküm no: 123 Orijinal metin no: [31a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müteveffâ el-Hâc Mehmed’in terekesindeki evin yarı hissesinin satışı, takas beyânı Mahmiye-i Galata hâricinde Kasımpaşa Câmi‘i mahallesinden olup bundan esbak deryâ seferinde vefât eden el-Hâc Mehmed’in sulbî sagīr oğlu Mustafa’ya vasiyy-i muhtâr olup ve sulbiye-i kebîre kızları Âmine ve Hatice ve zevce-i metrûkesi Âişe bt. Abdullah taraflarından dükkân-ı âti’l-beyânı bey‘a ve semenini deyn-i âti’z-zikre takāsa ziyâdesini kabz ve îsâle vekîlleri olup vesâyet ve vekâleti garîm-i münkir mahzarında nehc-i şer‘î üzre sâbite olan fahrü’l-eşbâh İbrahim Bey b. Mustafa meclis-i şer‘de hâmil-i hâze’l-kitâb fahrü’l-kāidîn Hasan Çavuş b. Abdülmennân mahzarında vesâyeten ve vekâleten bi’t-tav‘i’s-sâf ikrâr ve i‘tirâf edip müteveffâ-yı mezbûrun terekesinden mahmiye-i mezbûre dâhilinde Lonca mahallesinde vâki‘ bir tarafdan Mercan Ağa vakfı ve bir tarafdan Molla Kutbeddin vakfı ve iki tarafdan tarîk-i âm ile mahdûd olup ortasında mermer direğin cânib-i yemîninde olan nısfı Kutbeddin vakfı’ndan olmağla ücret-i mu‘accele ve müeccele ile müteveffâ-yı merkūm el-Hâc Mehmed’in tasarrufunda olup ve cânib-i yesârında olan nısfı müteveffâ-yı mezbûrun mülkü olup fevt oldukda bi tarîki’l-inhisâr sagīr-i mezbûr ve müvekkilât-ı merkūmeye intikāl eden bir bâb şekerci dükkânı müteveffâ-yı mezbûrun zarûret-i deyni için bi izni’l-hâkim mezâda verilip mirâren tâlibîne arz olundukda mülk olan nısfı otuz beş bin akçede ve vakıf olan nısfı yirmi bin akçede mezbûr Hasan Çavuş üzerinde karâr edip bir akçe ziyâde ile âhar tâlib bulunmamağın mülk olan nısfı vesâyet ve vekâletim hasebiyle mezbûr Hasan Çavuş’a otuz beş bin akçeye bey‘-i bâtt-ı sahîh-i şer‘î ile bey‘ edip semeni olan meblağ-ı merkūm otuz beş bin akçeden beş bin akçesin mezbûr Hasan Çavuş yedinden vesâyeten ve vekâleten alıp kabz edip bâkī otuz bin akçesini mezbûr Hasan Çavuş’un karz-ı şer‘îden müteveffâ-yı merkūm el-Hâc Mehmed’in zimmetinde olan otuz bin akçe deynine takās eyledim ba‘de’l-yevm zikr olunan nısf-ı memlûk mezbûr Hasan Çavuş’un mülk-i müşterâsıdır keyfe mâ yeşâ’ tasarruf eylesin ve vakıf olan nısfın dahi hakk-ı tasarrufunu ma‘rifet-i mütevellî ile bi’l-vesâye ve’l-vekâle mezkûr Hasan Çavuş’a yirmi bin akçeye tefvîz edip bedel-i tefvîz olan yirmi bin akçeyi mezbûr Hasan Çavuş yedinden vesâyeten ve vekâleten aldım kabz eyledim zikr olunan nısf-ı mevkūf mezkûr Hasan Çavuş’un tasarrufunda olup tasarrufuna kimesne mâni‘ olmasın dedikde mukırr-ı merkūm İbrahim Bey’in ber vech-i meşrûh sudûr eden ikrârını mukarrun leh el-merkūm Hasan Çavuş vicâhen tasdîk ve şifâhen tahkīk edicek mâ hüve’l-vâki‘ ketb olundu. Tahrîren fî evâhiri Zilhicceti’ş-şerîfe sene hamse aşere ve elf. Şuhûdü’l-hâl: Hasan b. Ali, Şükrullah Efendi b. İbrahim el-Kâtib, Mehmed Efendi b. Mustafa el-Kâtib, İbrahim b. Mehmed, Cafer b. Mehmed, Hüseyin el-Münâdî, Mustafa b. Mehmed, Mehmed b. Yusuf el-Muhzır