Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 123 Hüküm no: 124 Orijinal metin no: [31a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İcâreteynle işletilen Molla Kutbeddin Vakfı’na ait şekerci dükkanındaki tasarruf hissesinin yarısının satışı Mahmiye-i Galata hâricinde Kasımpaşa mahallesinde sâkin fahrü’l-kāidîn Hasan Çavuş b. Abdurrahman meclis-i şer‘de zevce ve halîlesi fahrü’l-muhadderât Âmine bt. el-Hâc Mehmed tarafından ikrâr-ı âti’l-beyânı tasdîke vekîl olup nehc-i şer‘î üzre vekâleti sâbite olan fahrü’l-eşbâh İbrahim Bey b. Mustafa mahzarında bi’t-tav‘i’s-sâf ikrâr ve i‘tirâf edip mahmiye-i mezbûre dâhilinde Lonca mahallesinde vâki‘ bir tarafdan Mercan Ağa vakfı ve bir tarafdan Molla Kutbeddin vakfı ve iki tarafdan tarîk-i âm ile mahdûd olup ortasında mermer direğin cânib-i yemîninde olan nısfı Kutbeddin vakfı’ndan olup icâre-i müeccele ve mu‘accele ile tasarrufumda olan ve cânib-i yesârında olan nısfı mülk-i müşterâm olan şekerci dükkânının mülk olan nısfının nısf-ı şâyi‘ini müvekkile-i mezbûre Âmine’ye on yedi bin nakd-i râyic fi’l-vakt fıddî Osmânî akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i müsemmen eyledim. Ba‘de’l-yevm zikr olunan nısfın nısf-ı şâyi‘i mezbûre Âmine’nin mülk-i müşterâsıdır keyfe mâ teşâ’ ve tahtâr mutasarrıfe olsun ve vakıfda olan nısfın dahi nısf-ı şâyi‘ini mütevellî-i vakıf ma‘rifetiyle Âmine’ye on bin nakd-i râyic fi’l-vakt fıddî Osmânî akçeye tefvîz edip bedel-i tefvîz olan meblağ-ı merkūm on bin akçeyi mezbûre Âmine yedinden aldım kabz eyledim ba‘de’l-yevm nısf-ı mevkūf-i mezbûrun dahi nısf-ı şâyi‘i mezbûre Âmine’nin tasarrufunda olup tasarrufuna kimesne mâni‘ ve müzâhim olmaya dedikde mukırr-ı merkūm Hasan Çavuş’un vech-i meşrûh [üzre] sudûr ve zuhûr eden ikrârını vekîl-i merkūm İbrahim Bey bi’l-vekâle vicâhen tasdîk ve şifâhen tahkīk edicek mâ vaka‘a bi’t-taleb ketb olundu. Tahrîren fi’t-târihi’l-mezbûr. Şuhûdü’l-hâl: es-Sâbikūn