Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 124 Hüküm no: 127 Orijinal metin no: [31b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Efendi b. Mustafa’nın mîrâsçılarının, alacaklarının taleb ve tahsili için Veli Kapudân’ı vekîl ettikleri Mahmiye-i Galata dâhilinde Sultan Bayezid mahallesinde sâkin olup cezîre-i Kıbrıs’da defterdâr iken bundan akdem vefât eden merhûm-i mebrûr İbrahim Efendi b. Mustafa’nın sulbiye sagīre kızı Sâliha’nın vasiyy-i şer‘iyyesi olan Aynî Hâtun bt. Abdullah ve merhûm-ı mezbûrun zevce-i metrûkesi ve vârisesi Fâtıma Hâtun bt. Veli Kapudân ve merhûm-ı mezbûrun sulbiye kebîre kızı Râbia ve sulbî kebîr oğlu İsmail Bey mahfil-i kazâda fahrü’l-emâsil ve’l-akrân müşârün-ileyh Veli Kapudân mahzarında ikrâr ve i‘tirâf edip merhûm-ı mezbûr Hazîne-i âmire’de olan dört kere yüz bin akçesini hâl-i hayâtında cânib-i mîrîden ahz etmeyip Hazîne-i âmire’de bâkī kalmağın meblağ-ı mezbûru taleb ve kabz ve îsâle ve meblağ-ı mezbûre müte‘allik olan cümle de‘âvî ve husûmâta müşârün-ileyh Veli Kapudân’ı vekîl ve kāimmakām eyledik dediklerinde [32a] müşârün-ileyh kapudân dahi kabûl edip ve cemî‘ hıdemâtı üzerine aldıkda mâ vaka‘a bi’t-taleb kayd olundu. Tahrîren fî evâili Muharrem sene sitte aşere ve elf. Şuhûdü’l-hâl: Hüseyin Bey [b.] Abdullah, Ali b. Yusuf, Mustafa Çelebi [b.] Ali