Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 129 Hüküm no: 137 Orijinal metin no: [33b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âmine Hâtun bt. Musli Reis’ten kalan evin İbrahim Bey b. Mahmud’a müzâyede ile satıldığı Mahmiye-i Galata müzâfâtından kasaba-i Kasımpaşa mahallâtından Sürûri Efendi mahallesinde sâkine olup bundan akdem müteveffât olan Âmine Hâtun bt. Musli Reis’in sadrî sagīr oğlu Mehmed ve sulbiye sagīre kızı Âişe’nin cânib-i şer‘-i kavîmden mansûb vasîsi olup ve merhûme-i merkūmenin anası ve vârisesi olan Kamer Hâtun bt. Osman meclis-i şer‘-i şerîfe-i garrâda râcilîn zümresinden İbrahim Bey b. Mahmud nâm râcil mahzarında bi’t-tav‘i’s-sâf ikrâr ve i‘tirâf edip merhûme-ı mezbûrenin muhallefâtından mahalle-i merkūmede vâki‘ olup bir beyt-i süflîyi ve bir beyt-i ulvîyi ve bir kenîfi ve eşcâr-ı müsmireyi müştemil olup bir tarafı Âişe Hâtun bt. Halime mülküne ve bir tarafı Baba Veli nâm muhzır mülküne ve tarafeyni tarîk-i âmma müntehî olup merhûme-i mesfûreden irs-i şer‘le bi tarîki’l-inhisâr bana ve sagīrân-ı mezbûrâna intikāl edip beynimizde on sekiz sehim olup üç sehmi benim hisse-i şer‘iyyem olup ve on sehmi merkūm Mehmed’in ve beş sehmi mesfûre Âişe’nin olan menzil sagīrân-ı mezbûrânın zarûret-i nafakaları için bey‘ olunmak lâzım geldikde sûk-ı sultânîde mezâd ve müzâyede olup mirâren tâlibîne arz olundukdan sonra altı bin akçede mezbûr İbrahim Bey’in üzerinde karâr edip bir akçe ziyâde ile âhar tâlib ve râgıb olmamağın on sekiz sehim olan menzil-i mezbûrdan bana intikāl eden üç sehim hisse-i şer‘iyyemi ve sagīr-i mezbûr Mehmed’e intikāl eden on sehim [34a] hisse-i şer‘iyyesini ve sagīre-i mezbûre Âişe’ye intikāl eden beş sehim hisse-i şer‘iyyesini asâleten ve vesâyeten mezbûr İbrahim Bey’e meblağ-ı mezbûr altı bin fıddî Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ eyledim ba‘de’l-yevm menzil-i mesfûr cemî‘ tevâbi‘iyle müşârün-ileyh İbrahim Bey’in mülk-i müşterâsıdır keyfe mâ yeşâ’ ve yahtâr tasarruf eylesin dedikde merkūme Kamer Hâtun’un asâleten ve vesâyeten vech-i meşrûh üzre sudûr eden ikrârını müşârün-ileyh İbrahim Bey vicâhen ve şifâhen tasdîk ve tahkīk eyledikde mâ vaka‘a gıbbe’t-taleb ketb olundu. Tahrîren fi’l-yevmi’l-hâmis ve’l-ışrîn min Muharremi’l-harâm sene sitte aşere ve elf. Şuhûdü’l-hâl: Receb Efendi b. Mustafa el-İmâm, Mehmed b. Hüdâverdi el-Müezzin, Ahmed Bey b. Abdüllatif, Pîrî Bey b. Şaban el-bevvâbü’s-sultânî, Ali Bey b. Ahmed el-bevvâbü’s-sultânî, Mehmed Bey b. Derviş el-Cündî, Mustafa Bey b. İbrahim er-Râcil, Mehmed Çelebi b. Mustafa, Nebi b. Mehmed