Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 128 Hüküm no: 136 Orijinal metin no: [33b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Evin mülkiyyetinin Cemile Hâtun bt. Hüseyin’e ait olduğu Mahmiye-i Galata hâricinde vâki‘ Kasımpaşa’da Bedreddin Bey mahallesinde bundan akdem vefât eden merhûm Musa Reis b. Bâli’nin li ebeveyn karındaşları ve vârisleri Mehmed ve Mustafa Bey husûs-ı âti’l-beyâna vekîl-i şer‘îsi olup vekâleti nehc-i şer‘î üzre sâbite olan Mehmed b. Ferruh ve merhûm-ı merkūmun diğer li ebeveyn karındaşı ve vârisi olan İbrahim’in husûs-ı âti’l-beyâna vekîl-i şer‘îsi olup vekâleti nehc-i şer‘î üzre sâbite olan Hayreddin Halîfe b. İbrahim mahfil-i kazâda merhûm-ı mezbûrun zevce-i metrûkesi ve vârisesi Cemile Hâtun bt. Hüseyin mahzarında her birisi vekâleten takrîr-i da‘vâ edip mahalle-i mezbûrede vâki‘ hudûdunun iki cânibi tarîk-i âmma ve bir cânibi Ali nâm kimesne mülküne, ve bir cânibi Derviş b. Abdullah mülküne müntehî olup iki beyt-i süflîyi ve bir beyt-i ulvîyi ve bir ulvî odayı ve bir tahtapûşu ve muhavvatayı ve bir kenîfi müştemil olup merhûm-ı mezbûrun muhallefâtından olup müvekkilân-ı mezbûrânın hisseleri olan menzilin cümlesine ve merkūme Cemile bilâ-vech-i şer‘î vaz‘-ı yed edip tasarruf eder vekâlet-i mahkiyem hasebiyle suâl olunması matlûbumuzdur dediklerinde gıbbe’s-suâl mezbûre Cemile bi’l-muvâcehe cevâbında menzil-i mezbûr benim mülk-i müşterâmdır deyip merhûm-ı mesfûrun mülkü olup muhallefâtından olduğunu inkâr ile vekîlân-ı mesfûrândan menzil-i mezbûr merhûm-ı mezbûrun mülkü olup muhallefâtından olduğuna beyyine taleb olundukda ityân-ı beyyineden izhâr-ı acz ettiklerinde kütüb-i şer‘iyye ve mu‘teberât-ı asliyyede mezkûr olan .....? amelen mezbûre Cemile’ye menzil-i mezbûr mülk-i müşterâsı olup vechen mine’l-vücûh mülkünden ihrâc etmediğine yemîn [teklîf] olunup ol dahi vech-i meşrûh üzre yemîn-i billâhi’l-aliyyi’l-azîm ettikde menzil-i mezbûr merkūme Cemile’nin mülkü olmasına hükm olunup mâ vaka‘a gıbbe’t-taleb ketb olundu. Cerâ zâlike ve hurrire fî evâhiri Muharrem sene sitte aşere ve elf. Şuhûdü’l-hâl: Seyyid Mehmed b. Seyyid Abdurrahman, Seyyid Mustafa b. Seyyid Mehmed, Mehmed Efendi b. İslâm, İsa Efendi b. Bayram, Mehmed Efendi b. Veli, İbrahim Efendi b. Muslihiddin, Mehmed b. Yusuf, Mustafa b. Mehmed ve gayruhüm