Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 132 Hüküm no: 143 Orijinal metin no: [34b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bayram Bey b. Mustafa’nın, evini Mehmed b. Abdullah’a sattığı İşbu husûs, medîne-i Galata müvellâsı el-fakīr Ömer b. Sadık’ın -ufiye anhümâ- tahrîr ettiği hüccetde zikr edildiği gibidir. Saray-ı âmire iç oğlanları zümresinden fahrü’l-a‘yân Bayram Bey b. Mustafa tarafından bey‘-i âti’z-zikri ikrâra vekâleti Ali b. Bâli ve Ramazan b. Hüdâverdi nâm kimesneler şehâdetleri ile sâbite olan bahçe-i hâs bostancılarından Hürrem b. Gāzi nâm kimesne meclis-i şer‘-i hatîru lâzimü’t-tevkīrde işbu kitâb-ı müstetâbın hâfızı Mehmed b. Abdullah el-Kalafatî muvâcehesinde bi’l-vekâle ikrâr ve i‘tirâf edip mahmiye-i Galata dâhilî mahallâtından Sultan Bayezid mahallesi demekle ma‘rûf olan mahallede vâki‘ iki beyt-i ulvîyi ve bir sofayı ve bir bi’r-i mâyı ve cüneyneyi ve kenîfi müştemil [35a] olup bir cânibi Manola bt. Mardiroz nâm Nasrâniye ve bir tarafı Manol v. Misket nâm Nasrânî ve bir cânibi müşterî-i merkūm mülkleri ve tarîk-i âm ile mahdûd ve mümtâz olup müvekkilim mûmâ-ileyh Bayram Bey mülk-i mevrûsu olan menzilini müşterî-i merkūm Mehmed’e yirmi sekiz bin fıddî râyic fi’l-vakt Osmânîye bey‘-i bâtt-ı sahîh-i şer‘î ile bey‘ edip kabz-ı semen-i merkūm ve teslîm-i müsemmen-i mersûm kıldı ba‘de’l-yevm menzil-i merkūm sâlifü’z-zikr Mehmed’in mülk-i müşterâsıdır keyfe mâ yeşâ’ ve yahtâr mutasarrıf ola dedikde mukırr-ı merkūmu ikrâr-ı meşrûhunda mukarrun leh el-mezkûr vicâhen tasdîk ve şifâhen tahkīk ettikden sonra mâ hüve’l-vâki‘ gıbbe’t-taleb ketb olundu. Tahrîren fî evâili şehri Şa‘bâni’l-mu‘azzam min şühûri sene semân ve elf mine’l-hicreti’n-Nebeviyye. Şuhûdü’l-hâl: Hasan b. Mehmed, Pîrî b. Nebi, İbrahim b. Abdullah, Şaban b. Mustafa, Mustafa b. Mehmed, Hüseyin b. Murad, Mustafa b. Abdullah, Ahmed b. Abdullah ve gayruhüm