Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 133 Hüküm no: 144 Orijinal metin no: [35a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Efendi b. Abdülaziz’in terekesindeki bazı mallarda istihkak iddiası Osman Çelebi b. Abdülaziz nâm kimesne meclis-i kazâda mahmiye-i Galata hâricinde Hoca Ali mahallesinde bundan akdem vefât eden merhûm-ı mebrûr Yusuf Efendi b. Abdülaziz’in zevce-i metrûkesi ve vârisesi olup ba‘zı muhallefâtına vâzı‘atü’l-yed olan Sâliha Hâtun bt. Hasan mahzarında takrîr-i da‘vâ edip zevce-i mezbûre merhûm-ı mûmâ-ileyhin zimmetinde olan otuz bin akçe mehr-i müeccelinden yirmi bin akçesi mukābelesinde ber mûceb-i defter-i kassâm cem‘an yirmi bin akçesini alıp esbâb-ı merhûm-ı mesfûrun muhallefâtından ahz u kabz edip benim dahi merhûm-ı mûmâ-ileyhin zimmetinde beynimizde ilm-i şer‘î ile harîr bahâsından sekiz bin akçe hakkım olup zevce-i mezbûrenin makbûzu olan merhûm-ı mûmâ-ileyhin yirmi bin akçe kıymetli muhallefât zevce-i mezbûre ile beynimizde taksîm-i guremâ olundukda zikr olunan sekiz bin akçe hakkım mukābelesine dört bin iki yüz on akçe kıymetli esbâb benim olmağın hâlâ zevce-i mezbûreden taleb ederim dedikde gıbbe’s-suâl zevce-i mezbûre bi’l-muvâcehe cevâbında fi’l-vâki‘ merhûm-ı mûmâ-ileyhin muhallefâtından otuz bin akçe mehr-i müeccelimden yirmi bin akçesi mukābelesinde ber mûceb-i defter-i kassâm yirmi bin akçe kıymetli esbâb ahz u kabz eyledim dedikde mezbûr Osman Çelebi yedinde olan hüccet-i şer‘iyyesi mûcebince meblağ-ı mesfûr sekiz bin akçe hakkı mukābelesinde zevce-i mesfûre ahz u kabz ettiği yirmi bin akçe kıymetli muhallefâtdan taksîm-i guremâ tarîkiyle âid olan dört bin iki yüz on akçe hakkını teslîme tenbîh olunup mâ vaka‘a gıbbe’t-taleb ketb olundu. Cerâ zâlike ve hurrire fî evâhiri Muharrem sene sitte aşere ve elf. Şuhûdü’l-hâl: Mehmed Çelebi b. Cafer Bey, Mustafa b. Mehmed, Mahmud b. Mehmed el-İmâm, Mahmud b. Mustafa el-Kâtib, Ahmed Çavuş b. eş-şehîr bi Hamamcı zâde, Mehmed b. Yusuf ve gayruhüm