Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 134 Hüküm no: 145 Orijinal metin no: [35b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Maktûl İbrahim Paşa Vakfı’ndan olup icâreteynle işletilen bakkal dükkanındaki tasarruf hakkının yarı hissesinin devri Mahmiye-i Galata hâricinde Müeyyedzâde mahallesinde sâkine olup bundan akdem müteveffât olan merhûme Âişe Hâtun bt. Rüstem’in sadrî oğlu Ali b. Mehmed nâm sagīrin cânib-i şer‘-i kavîmden mansûb vasîsi olan fahrü’l-akrân Ahmed Bey b. Abdüllatif meclis-i şer‘-i hatîru lâzimü’t-tevkīrde işbu sâhibü’l-kitâb fahrü’r-rüesâ Ahmed Reis b. Mustafa er-Reis el-hâssa mahzarında bi’t-tav‘i’s-sâf ikrâr ve i‘tirâf edip merhûme-ı mezbûreden kānûn-ı pâdişâhî üzre hakk-ı tasarrufu müteveffât oldukda oğlu sagīr-i mezbûr Ali’ye intikāl edip mahmiye-i mezbûre hâricinde yağ kapanı kurbunda câmi‘-i şerîf altında vâki‘ merhûm Maktûl İbrahim Paşa vakfı’ndan olup iki tarafı tarîk-i âm ve tarafeyni yine vakf-ı mezbûra müntehî olup icâre-i müeccele ve mu‘accele ile taht-ı tasarrufunda olan bir bâb bakkal dükkânının nısf hisse-i şâyi‘asını sagīr-i mezbûrun zarûret-i nafakası için mütevellîsi ma‘rifeti ile merkūm Ahmed Reis’e on beş bin fıddî-i Osmânî râyic akçeye vesâyeten tefvîz edip ol dahi tefevvuz, mukābele-i tefvîzde meblağ-ı mezbûr on beş bin akçeyi mersûm Ahmed Reis yedinden bi’t-tamâm ahz u kabz eyledim dedikde mezkûr Ahmed Bey vech-i meşrûh üzre vesâyeten sudûr eden kelâmını mezbûr Ahmed Reis vicâhen tasdîk ve şifâhen tahkīk eyledikde mâ vaka‘a gıbbe’t-taleb ketb olundu. Tahrîren fî evâili Muharremi’l-harâm sene sitte aşere ve elf. Şuhûdü’l-hâl: Keyvan Bey b. Abdullah Kethüdâ-yı bezzâzistan-ı Galata, Rıdvan Bey b. Abdullah, Abdülkādir Hoca b. Hacı, Ahmed b. Ali, Sefer Hoca b. Murtaza, Mehmed b. Hasan, Memi Reis b. Ali