Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 142 Hüküm no: 157 Orijinal metin no: [38b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha Hâtun bt. el-Hâc Hasan’ın kocasından intikal eden mîrâs payını aldığı Mahmiye-i Galata hâricinde Hoca Ali mahallesinde bundan akdem vefât eden merhûm-ı mezbûr Mehmed Kerâmî Efendi b. Abdülaziz’in zevce-i metrûkesi ve vârisesi Sâliha Hâtun bt. el-Hâc Hasan nâm hâtunun husûs-ı âti’l-beyâna vekîl-i şer‘îsi olup vekâleti nehc-i şer‘î üzre sâbite olan Ferruh Bey b. Abdullah merhûm-ı mezbûrun sulbî sagīr oğlu Fazlullah’a vasiyy-i muhtâr olan fahrü’l-eimme Mustafa Efendi b. Abdülaziz mahzarında vekâleten bi’t-tav‘i’s-sâf ikrâr ve i‘tirâf edip merhûm-i mûmâ-ileyhin cümle muhallefâtından düyûn-i müsbetesi ve zevcesi mezbûre Sâliha Hâtun’un mehr-i müecceli otuz bin Osmânî akçe edâ olunup ve sâir harâcı ihrâc olundukdan sonra bâkī kalan meblağ bi tarîki’l-inhisâr zevce-i mezbûre ile ve sagīr-i merkūm beyninde kassâm defterinde taksîm olunduğu üzre müvekkilem mezbûre Sâliha’ya irs-i şer‘le âid olan yedi yüz otuz dört akçe sümün hisse-i şer‘iyyesini îsâl için vekâlet-i mahkiyem hasebiyle vasiyy-i mûmâ-ileyh yedinden bi’t-tamâm ahz u kabz eyledim dedikde vekîl-i mûmâ-ileyhin vekâleten vech-i meşrûh üzre sudûr eden kelâmını vasiyy-i mûmâ-ileyh Mustafa Efendi vicâhen tasdîk ve şifâhen tahkīk eyledikde mâ vaka‘a gıbbe’t-taleb ketb olundu. Cerâ zâlike ve hurrire fî evâsıtı Saferi’l-muzaffer sene sitte aşere ve elf. Şuhûdü’l-hâl: Memi Ağa b. Abdullah, Osman Bey b. Cafer, Murad Ağa b. Abdullah, Ramazan b. Abdullah, Kâtib Ahmed Efendi, Abdülkerim Çelebi b. Mehmed Efendi, Mustafa b. Mehmed, Mehmed b. Yusuf