Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 160 Hüküm no: 189 Orijinal metin no: [46b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Reis b. Mehmed’in, oğluna sağlığında vasiyy-i muhtâr nasb ettiği el-Hâc Hasan b. Mehmed ve Mehmed b. Abdullah nâm kimesneler, Galata hâricinde vâki‘ Müeyyedzâde mahallesinde vefât eden merhûm Ahmed Reis b. Mehmed’in zevcesi ve vârisi olan Rahime bt. İbrahim nâm hâtun kıbelinden husûs-ı âti’l-beyânı inkâra vekâleti sâbit olan vekîl Abdülkādir Halîfe b. Hacı nâm hasm-ı câhid mahzarında, hâmil-i hâze’l-kitâb el-Hâc Sefer b. Davud’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, merhûm-ı mezbûr hâl-i hayâtı ve kemâl-i akl ve sıhhatinde lehine şâhidlik yapılan el-Hâc Sefer’i sagīr-i mezbûr oğluna kendisinden irs-i şer‘le intikāl edecek malların zabtı ve hıfz-ı ahvâli için vasî seçip nasb etmişdi. O da vesâyet-i mezbûreyi kabûl edip hizmet-i lâzımesini edâyı üzerine aldı. Şehâdetleri ba‘de şerâiti’l-kabûl inde’ş-şer‘ mu‘teber ve makbûl olmağın târih-i mezbûrda mûcebince böyle hükm edildi. Şuhûdü’l-hâl: el-Hâc Mustafa b. Abdullah, Mustafa Reis b. Abdullah, Pîrî Çelebi b. Mehmed, Mehmed b. Ali, Mehmed b. Yusuf, Mustafa b. Mehmed ve gayruhüm