Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 163 Hüküm no: 194 Orijinal metin no: [47b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ahmed’in babasından intikal eden parayı vasîden aldığı Mahmiye-i Galata hâricinde vâki‘ Müeyyedzâde mahallesi sâkinlerinden müteveffâ Ahmed’in bi nefsihî oğlu Mehmed nâm bâliğ mahfil-i kazâda işbu hâmilü’l-kitâb Yahya Bey b. Abdülvehhâb mahzarında ikrâr edip ben sagīr iken bundan akdem mezbûr Yahya Bey benim vasiyy-i muhtârım olup pederim müteveffâ-yı mezbûrdan ve vâlidem Fâtıma Hâtun’dan bana irs-i şer‘le intikāl eden hisse-i şer‘iyyem on altı bin akçenin nısfı sekiz bin akçe olup meblağ-ı mezbûru vasiyy-i merkūm Yahya Bey’den bi’t-tamâm alıp kabz eyledim mezbûrun zimmetini berî kıldım ba‘de’l-yevm benden asâleten ve vekâleten husûs-ı mezbûra müte‘allik da‘vâ sudûr ederse lede’l-hükkâm makbûle olmaya dedikde mukırr-ı mezbûrun ikrârını mukarrun lehü’l-mezbûr Yahya tasdîk edip mâ vaka‘a gıbbe’t-taleb kayd olundu. Tahrîren fî evâili Rebî‘ilâhir sene sitte aşere ve elf. Şuhûdü’l-hâl: Ahmed Efendi el-İmâm, Mustafa Çelebi b. Mehmed, Receb b. Bâli, Mehmed b. Mustafa, İbrahim b. Mustafa, Mustafa Bey b. Abdullah, Mustafa Bey b. Hasan, Yusuf [b.] Ali, Mehmed [b.] Yusuf