Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 179 Hüküm no: 219 Orijinal metin no: [54b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Manol v. Andon nâm Efrencînin Mekri asıllı câriyesini âzad etmesi Mahmiye-i Galata dâhilinde Dörtyol ağzı nâm mevzi‘in kurbunda sâkin Manol v. Andon nâm Efrencî mahfil-i kazâda bi’t-tav‘i’s-sâf ikrâr ve i‘tirâf edip işbu hâmil-i hâze’l-kitâb açık kaşlı sarı elâ gözlü orta boylu ak benizli Mekriliyyü’l-asl başında alâmet-i kar‘ ve sol kaşı üstünde eser-i cerâhati olan Katrina v. Hahodi nâm câriyesini malımdan i‘tâk ve mülkiyyetinden ıtlâk edip müzâyaka-i rıkkıyyetinden ihrâc ve kazâ-yı hürriyetine idhâl ve îlac eyledim min ba‘d mevlâ üzerine sâbit olan hakk-ı velâdan gayrı hakkım kalmadı sâir harâir-i mükellefât gibi hürre oldu dedikde mukırr-ı mezbûrun vech-i meşrûh üzre sudûr eden ikrârını merkūme Katrina vicâhen tasdîk ve şifâhen tahkīk eyledikde mâ vaka‘a gıbbe’t-taleb ketb olundu. Cerâ fi’l-yevmi’l-hâdî ve’l-ışrîn min Cumâdelûlâ sene sitte aşere ve elf. Şuhûdü’l-hâl: Ahmed Bey b. Abdüllatif, Mehmed b. Yusuf, Mustafa b. Mehmed, fahrü’l-eşbâh Memi Bey b. Abdullah, Mehmed Halîfe b. Hüsrev el-İmâm, Kâtibü’l-hurûf Mehmed b. Mustafa, Murad Ağa b. Abdullah ve gayruhüm [55a] Yevmü’l-isneyn 24 Yevmü’s-sülesâ 25 Yevmü’l-erbi‘â 26 Yevmü’l-hamîs 27 Yevmü’l-cum‘a 28 Yevmü’s-sebt 29