Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 178 Hüküm no: 218 Orijinal metin no: [54a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hâtun bt. Hasan’ın mirasçısının miras hissesini aldığı Mahmiye-i Galata hâricinde Tomtom mahallesinde bundan akdem vefât eden merhûme Fâtıma Hâtun bt. Hasan’ın verâseti zevci fahrü’l-etıbbâi’l-hâs Mehmed Bey b. Abdullah ve anası Hasnâ bt. Abdullah ve sadriyye kebîre kızı Âişe bt. Abdi Reis, sadrî sagīr oğlu Ahmed b. Mehmed Bey el-mezbûra münhasıra oldukdan sonra mezbûr Mehmed Bey mahfil-i kazâda mezbûre Âişe’nin husûs-ı âti’l-beyâna vekîl-i şer‘îsi olup vekâleti hasm-ı câhid mahzarında nehc-i şer‘î üzre sâbit olan fahrü’r-râcilîn Mahmud Bey b. Abdullah mahzarında kendi tarafından asâleten ve sagīr-i mezbûr tarafından vesâyeten bi’t-tav‘i’s-sâf ikrâr ve i‘tirâf edip zevcem müteveffât mezbûre Fâtıma’nın zevc-i sâbıkı mezbûr Abdi Reis’e intimâ ile tahdîd ve tavsîfden müstağnî mahalle-i mezbûrede vâki‘ olan menzil mukaddemâ merhûm-ı mezbûr Abdi Reis’den zevcem mezbûre Fâtıma’ya ve sâir veresesine intikāl etmek mülâhazasıyla hâlâ mezbûre Fâtıma’nın hissesini muhallefât defterine idhâl etmiş idik el-hâletü hâzihî zikr olunan menzili mezbûr Abdi Reis Kâbe’ye müteveccih olmağla hâl-i sıhhatinde kızı mezbûre Âişe’ye temlîk ettiği nehc-i şer‘î üzre sâbit olup zevcem mezbûre Fâtıma’nın muhallefâtından olmadığı müte‘ayyin olmağla taksîm-i evvel fesh, defter-i sâbık ilgā olunup mezbûre Fâtıma’nın muhallefâtı cem‘an elli bir bin yedi yüz altmış akçe olup on iki bin yedi yüz yetmiş akçesi vasiyyeti üzre techîz ve tekfîn ve sâir mesârifine harc olunup ve bana on yedi bin akçe deyni olmağla zikr olunan on yedi bin akçeyi ben dahi alıp kabz edip ve Ahmed nâm kapıcıya deyni olan yalnız iki bin üç yüz akçe teslîm olunup mecmû‘ isrâfât otuz iki bin yetmiş akçe ve bakiyye-i muhallefât on dokuz bin altı yüz doksan akçe olup meblağ-ı bâkī beyne’l-verese el-mezbûre taksîm olundukda bana dört bin dokuz yüz yirmi iki akçe ve oğlu sagīr-i mezbûr [54b] Ahmed’e yedi bin yedi yüz elli sekiz akçe âid olup mecmû‘u on iki bin beş yüz seksen akçe olup ve mezbûre Âişe’ye üç bin sekiz yüz yirmi dokuz akçe ve vâlidesi mezbûre Hasnâ’ya üç bin iki yüz seksen bir akçe âid olup bana oğlum sagīr-i mezbûrdan intikāl eden on iki bin beş yüz seksen akçeyi asâleten ve vesâyeten vekîl-i mezbûr Mahmud Bey yedinden mezbûre Fâtıma Hâtun’un bi’t-tamâm ve’l-kemâl alıp kabz eyledim mezbûre Âişe’nin zimmetini zikr olunan menzile ve vâlidesi merhûme-ı mezbûre zimmetinde olan meblağ-ı mezbûr on yedi bin akçeyi ve sâir muhallefâtdan olan hisse-i şer‘iyyeye müte‘allik de‘âvî ve husûmâtdan ibrâ-i âm ile ibrâ ve iskāt-ı tâm ile iskāt eyledim ba‘de’l-yevm benden asâleten veya vekîlimden vekâleten husûs-ı mezbûra müte‘allik da‘vâ ve husûmât sâdıra olursa lede’l-hükkâmi’l-kirâm mesmû‘ olmaya mukırr-ı mezbûr Mehmed Bey’in vech-i meşrûh üzre sudûr eden kelâmını vekîl-i mezbûr Mahmud Bey vicâhen tasdîk ve şifâhen tahkīk eyledikde mâ vaka‘a gıbbe’t-taleb ketb olundu. Cerâ zâlike ve hurrire fi’l-yevmi’s-sâlis aşere min şehri Cumâdelûlâ sene sitte aşere ve elf. Şuhûdü’l-hâl: Mustafa Efendi b. Abdülaziz el-İmâm, Gülâbi Reis b. Pîr Nefes, el-Hâc Kasım b. Abdullah, Receb b. Mustafa, Ömer b. Sefer, Mehmed Efendi b. Hızır el-İmâm, Mehmed Efendi b. Mehmed min zümre-i küttâb-ı Dîvân, el-Hâc Mehmed b. Ahmed, el-Hâc Mehmed b. Süleyman, Mustafa b. Ali, İskender b. Mehmed, Hüseyin b. Abdullah, Memi Reis b. Mustafa, es-Seyyid Mahmud b. es-Seyyid Mustafa el-Müezzin, eş-Şeyh Ramazan Efendi b. Mahmud, Mehmed Çelebi b. Cafer Bey, Ali Efendi b. Uğurlu, el-Hâc Mustafa b. Mehmed er-Râcil ve gayruhüm