Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 180 Hüküm no: 221 Orijinal metin no: [55a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa b. el-Hâc Ömer’in Cihangir’deki evini oğluna bağışladığı Mahmiye-i Galata hâricinde vâki‘ merhûm ve mağfûrun-leh Cihangir mahallesinde sâkin Dergâh-ı âlî müteferrikalarından Ahmed Ağa b. el-Hâc Ömer mahfil-i kazâda işbu sâhibü’l-kitâb sadrî oğlu Ömer Çelebi mahzarında takrîr-i kelâm edip mahalle-i mezbûrede vâki‘ hudûdunun Kıble tarafı tarîk-i âm ve şark tarafı İbrahim Çelebi b. el-Hâc Sinan mülkü ve garb tarafı yine tarîk-i âm ve şimâl tarafı Seydi Bey mülkü ile mahdûd olup fevkānî ve tahtânî on bir bâb oda ve iki matbah ve iki bi’r ve bir hamam ve üç sofa ve kiler ve ıstabl ve bahçeyi müştemil mülk evimi cümle tevâbi‘ ve levâhıkı ile târih-i kitâbdan beş yıl mukaddem zeyl-i kitâbda mastûrü’l-esâmî olan kimesneler mahzarında oğlum mezbûr sünnet olduğu zamânda Resûl-i ekrem hürmetine zikr olunan hudûd ile mahdûd evlerimi min ba‘d oğlum Ömer Çelebi’ye temlîk ve teslîm edip ol dahi kabûl ve kabz ve tesellüm edip müstakil zabt ve tasarruf etti. Zikr olunan evler oğlum merkūm Ömer’in mülk-i mevhûbesidir benim kat‘â alâkam yoktur diye bi’t-tav‘i’s-sâf ikrâr ve i‘tirâf eyledikde mukırr-ı mezbûrun vech-i meşrûh üzre olan ikrârını mukarrun lehü’l-merkūm Ömer Çelebi bi’l-muvâcehe tasdîk ve bi’ş-şifâhe tahkīk ettikde tarafeynin ikrâr ve tasdîkleri gıbbe’t-taleb ber sebeb-i temessük ketb olunup yedine def‘ olundu. Tahrîren fî 23 Cumâdelûlâ sene sitte aşere ve elf.