Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 180 Hüküm no: 222 Orijinal metin no: [55a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa b. el-Hâc Ömer’in İznikmid’deki çiftliğini ve müştemilâtını oğluna bağışladığı Mahrûse-i Galata hâricinde vâki‘ Cihangir mahallesinde sâkin Dergâh-ı âlî müteferrikalarından Ahmed Ağa b. el-Hâc Ömer mahfil-i kazâda işbu hâmilü’l-kitâb sadrî oğlu Ömer Çelebi mahzarında takrîr-i kelâm ve ta‘bîr-i merâm edip bundan akdem İznikmid kazâsında seksen bin akçeye şirâ-yı şer‘î ile iştirâ eylediği inde’l-cîrân ma‘lûmü’l-hudûd olan mülk çiftliği içinde sâkin olan İskender ve Ramazan ve Rıdvan ve Cafer ve Balaban nâm gılmân ve Yasemin ve Hasnâ ve Kamer nâm câriyelerle elli dört re’s kara sığır ve altı re’s kısrak [55b] ve üç çatma ambar ve üç bâb oda ve ıstabl ve samanlık ve kırk aded kuzu ve cümle içinde olan tevâbi‘ ve levâhıkı ile mezbûr oğluma târih-i kitâbdan bir yıl mukaddem hibe ve temlîk edip ol dahi kabûl ve kabz ve tesellüm edip elân zabtındadır benim kat‘â alâkam yoktur zikr olunan çiftlik mezbûr oğlumun mülk-i mevhûbesidir diye ikrâr eyledikde mukırr-ı mezbûrun vech-i meşrûh üzre olan ikrârını mukarrun lehü’l-merkūm Ömer Çelebi bi’l-muvâcehe tasdîk ve bi’ş-şifâhe tahkīk eyledikde mâ hüve’l-vâki‘ ber sebeb-i temessük ketb ve yed-i tâlibe def‘ olundu. Tahrîren fî evâhiri Cumâdelûlâ sene sitte aşere ve elf. Şuhûdü’l-hâl: Fahrü’l-emsâl Hoca Maksud b. Hoca Ramazan, İhsan Bey b. Abdullah Kâtib-i dergâh-ı âlî, fahrü’l-emâsil Hoca İbrahim b. el-Hâc Sinan, Şaban Bey b. Mustafa er-Reis, Keyvan Bey b. Abdullah, el-Hâc Mikâil b. Mahmud, Mehmed Çelebi b. Ahmed Çelebi, Yusuf Bey b. Mahmud es-Sarrâc, Muslihiddin b. Mehmed ve gayruhüm Yevmü’l-ehad Yevmü’l-isneyn Yevmü’s-sülesâ Yevmü’l-erbi‘â Yevmü’l-hamîs el-mübârek inşâallahü ta‘âlâ