Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 188 Hüküm no: 236 Orijinal metin no: [58a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bahçenin Mustafa Bey’in mülkiyyetinde olduğu Kazâ-yı Galata müzâfâtından Beşiktaş’da merhûm Sinan Paşa câmi‘i mahallesinde vefât eden merhûme Râziye bt. Abdullah’ın sagīre kızı Fâtıma bt. Mustafa’nın vasiyy-i şer‘îsi Mustafa b. Mehmed meclis-i şerîfde sagīre-i mezbûrenin vâlidi ve müteveffât-ı merkūmenin zevc-i metrûkü olup hadîka-i âti’l-beyâna vaz‘-ı yedi ale’ş-şer‘ sâbit olan hâfız-ı hâze’l-kitâb eş-şer‘î Mustafa Bey b. Hızır es-Sarrâcü’s-sultânî mahzarında takrîr-i da‘vâ edip müteveffât-ı mezbûrenin mahalle-i mezbûrede vâki‘ ve mezbûreye intimâ ile tahdîd ve tavsîfden müstağnî olup bir tarafı Hacı Mahmud mülkü ve üç tarafdan müdde‘â aleyh-i mezbûr mülküne muttasıl olup eşcârı ve bi’r-i mâyı ve bir bağ evini müştemil ...? yer müteveffât-ı mezbûrenin mülkü olup zikr olunan iki vâris beyninde müşterek iken hâliyâ mezbûr Mustafa Bey tamâmına vaz‘-ı yed edip bi hasebi’l-vesâye hisse-i sagīrede beni tasarrufdan men‘ eder suâl olunmak maksûdumdur dedikde gıbbe’s-suâl mezbûr Mustafa Bey müdde‘î-yi mezbûrun takrîrini tasdîk ve kelâmını tahkīk edip lâkin mezbûr Râziye hâl-i sıhhatinde zikr olunan arzı bana şart ve şart-ı hibe edip ben dahi kabûl ve kabz ettikden sonra Fâtıma bt. Abdullah nâm câriye-i Habeşiyyeyi arz-ı mezbûra ivaz verip ba‘de’l-kabz ve’l-kabûl mezbûre Râziye altmış iki filoriye câriye-i mezbûreyi bey‘ ve semenini kabz eyledim fe-li-hâzâ arz-ı mezbûre benim mülkümdür diye cevâb verip ba‘de’l-inkâr ve’l-istişhâd udûl-i müslimînden ahâlî-i mahalle-i mezbûreden Mehmed Bey b. Mahmud el-bevvâbü’s-sultânî ve Mehmed b. Ali el-Cündî ve Rıdvan b. Abdullah el-Cündî li ecli’ş-şehâde hâzırân olup gıbbe’l-istişhâd mezbûr Mustafa Bey’in takrîrine muvâfık alâ vech-i hasmi’ş-şer‘î şehâdet ettiklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâki‘ olup mezbûr Mustafa Bey’e zikr olunan arzı bir tarîk ile mülkünden ihrâc ve mezbûre Râziye mülküne idhâl etmediğine yemîn teklîf olundukda ber muktezâ-yı şer‘-i şerîf yemîn-i billâh edip mûcebiyle hükm olunup yed-i tâlibe vaz‘ olundu. Tahrîren fî evâsıtı Cumâdelâhire sene sitte aşere ve elf. Şuhûdü’l-hâl: es-Sâbikūn Yevmü’l-erbi‘â 17 el-mübârek inşâallahü ta‘âlâ [58b] Yevmü’l-hamîs 18 Yevmü’l-cum‘a 19 Yevmü’s-sebt 20 Yevmü’l-ehad 21 Yevmü’l-isneyn 22 Yevmü’s-sülesâ 23 Yevmü’l-erbi‘â 24 Yevmü’l-hamîs 25 Yevmü’l-cum‘a 26 Yevmü’s-sebt 27 Yevmü’l-ehad Yevmü’l-isneyn Yevmü’s-sülesâ min Recebi’l-ferd