Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 189 Hüküm no: 237 Orijinal metin no: [58b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasım Paşa Evkâfı’nın kira alacağı olduğu Merhûm ve mağfûrun-leh Kasım Paşa evkāfı mütevellîsi fahrü’l-akrân Mustafa Bey b. Ferhad meclis-i şer‘-i şerîf-i sâmihü’l-imâd ve mahfil-i dîn-i münîf-i râsihü’l-evtâdda kazâ-yı Galata müzâfâtından nâhiye-i İstinye sükkânından olup Bahr-i siyah seferinde Kozlu kalesinde şehîd olan merhûm Mustafa Reis b. Abdullah’ın zevce-i metrûkesi Sâliha Hâtun bt. Siyâmi Reis ve evlâd-ı sıgārı Mehmed ve Ali ve İbrahim ve Âişe ve Fâtıma’nın vasiyy-i şer‘îsi fahrü’l-eşbâh Musli Çelebi b. Mehmed mahzarında takrîr-i da‘vâ edip vakf-ı mezbûr malından müdde‘â-yı mezbûrda otuz bin fıddî akçe olup bi tarîki’l-istiğlâl İstinye’de Yeniköy’de Makbere burnu demekle ma‘rûf mevzi‘de bir cânibi zimmî Danyal ve bir cânibi zimmî Mardiye ve bir cânibi zimmî İstavrol mülkleri ile mahdûd mülk menzilini selâse aşere elf Zilka‘desi gurresinde otuz bin akçeye bana bey‘ ve meblağ-ı mezbûr ile semenini mukāssa ve geri menzil-i mezbûru târih-i mezkûrdan beher sene üç bin akçeye istîcâr edip târih-i kitâba değin cem‘an bir yıl ve sekiz mâh mâl-ı icâreden beş bin akçe zimmet-i müteveffâdan taleb ederim deyip makāline şâhid hüccet-i şer‘iyye ibrâz edip mazmûn-ı hüccet vasiyy-i mezbûrdan suâl olundukda gıbbe’l-inkâr ve akībe’l-istişhâd udûl-i ricâlden karye-i mezbûre hatîbi mevlânâ Abdüsselâm b. As ve karye-i mezbûre sükkânından Receb b. Abdullah li ecli’ş-şehâde hâzırân olup mütevellî-i mezbûrun takrîrine muvâfık makāline mutâbık alâ vechi’l-hasm edâ-i şehâdet-i şer‘iyye ettiklerinde şehâdetleri ba‘de ri‘âyeti şerâiti’l-kabûl hayyiz-i kabûle mevsûle oldukdan sonra gıbbe’l-istihlâf mütevellî-i mezbûr küllen ve ba‘zan meblağ-ı mesfûru müteveffâ-yı mezbûrdan almayıp bir tarîk ile zimmetin ibrâ etmediğine yemîn billâhi ta‘âlâ ettikde mûcebi ile hükm olunup mâ vaka‘a zabt olundu. Tahrîren fî gurreti Zilka‘de sene sitte aşere ve elf. Şuhûdü’l-hâl: Abdüsselâm b. As el-İmâm, Receb Beşe b. Abdullah, Hüseyin b. Ali, Ali b. İsmail, İvaz b. Ali, Mehmed Bey b. Abdullah, Osman b. Abdullah Yevmü’l-erbi‘â Yevmü’l-hamîs