Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 194 Hüküm no: 244 Orijinal metin no: [60a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vasînin zimmetinin ibrâ edilmesi Budur ki, fahrü’l-havâs ve’l-mukarrebîn hâlâ bostancılar kethüdâsı Mehmed Ağa b. Abdullah tarafından husûs-ı âti’l-beyâna vekâleti nehc-i şer‘î üzre sâbit olan Hüseyin Beşe b. Abdullah er-Râcil meclis-i şerîfde bundan akdem Makrahorya’da vefât eden Ali Çelebi b. Turhan’ın sagīr oğulları Mehmed ve Mustafa’nın vasiyy-i şer‘îleri hâfız-ı hâze’l-kitâb el-Hâc Halil b. Abdullah mahzarında bi’t-tav‘i’s-sâf ikrâr ve i‘tirâf edip müteveffâ-yı mezbûrun verâseti oğulları mezbûrân Mehmed ve Mustafa’ya münhasır olup ba‘dehû Mehmed fevt olup verâseti birâderi mezbûr Mustafa’ya münhasır olup Mustafa bostancılar zümresinden olup hâlâ ol dahi fevt olmağla bostancılar beytülmâline emânet müvekkilim kethüdâ hizmetlerinin vazîfesi olmağla vasiyy-i mezbûr ile muhâsebe edip müteveffâ-yı mezbûrun muhallefâtı ve iki yetîmin ulûfeleri ve çukaları cem‘an elli bin akçe olup hak ve adl üzre teftîş ve tefahhus olundukda yetîmlerin altı sene ve dört ay yevmî on üçer akçeden nafaka ve kisvelerine ve hitân cem‘iyyetine ve vefâtlarında techîz ve tekfîn ve sâir mesârif-i ma‘kūlesine cem‘an otuz dört bin sekiz yüz akçe sarf olunmuş bulunup zimmet-i vasiyy-i mezbûrda on beş bin iki yüz akçe bâkī olup ve a‘yân-ı mevcûdeden yedinde iki köhne sandık ve bir anbar ve bir köhne gümüşlü bıçak olup bi hasebi’l-emâneti’l-mahkiye müvekkilim kethüdâ hizmetleri? vasiyy-i mezbûr yedinden meblağ-ı mezbûr on beş bin iki yüz akçeyi [60b] ve zikr olunan esbâbı alıp kabz edip zimmetin ibrâ eyledi dedikde vekîl-i mezbûru kelâm-ı meşrûhunda mukarrun leh-i mezbûr el-Hâc Halil tasdîk etmeğin mâ vaka‘a zabt olundu. Tahrîren fi’l-yevmi’s-sânî min şehri Recebi’l-mürecceb sene sitte aşere ve elf. Şuhûdü’l-hâl: Fahrü’l-kuzât Ali Efendi b. Ahmed Fakīh, Hacı İbrahim b. Maksud, Ali Çelebi b. er-Râcil, Ferhad b. Abdullah, Mustafa b. Abdullah, İdris b. Abdullah, Yusuf b. Abdullah, Mehmed b. Abdullah ve gayruhüm Yevmü’l-isneyn Yevmü’s-sülesâ Yevmü’l-erbi‘â Yevmü’l-hamîs 18