Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 193 Hüküm no: 243 Orijinal metin no: [60a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Mehmed b. Ahmed’in el-Hâc Hasan b. İsmail’de alacağı olduğu Budur ki Bundan akdem kazâ-i Galata müzâfâtından kasaba-i Kasımpaşa’da Câmi‘-i kebîr mahallesinde fevt olan el-Hâc Mehmed b. Ahmed ed-Debbâğ’ın zevce-i metrûkesi ve kız-ı sagīresi Fâtıma ve Âişe’nin vasîsi hâmiletü hâze’l-kitâb Nisâ Hâtun bt. Mustafa meclis-i mutahharda kasaba-i mezbûreden el-Hâc Hasan b. İsmail ed-Debbâğ mahzarında takrîr-i da‘vâ edip müteveffâ-yı mezbûrun mezbûr el-Hâc Hasan zimmetinde esbâb ve bâğât bahâsından doksan üç bin akçe hakkı olup zevcim mezbûr el-Hâc Mehmed vefât ettikde mahzar-ı müslimînde i‘tirâf dahi edip semen yetmiş üç bin akçeyi bi’d-defe‘ât vesâyetim ve verâsetim hasebiyle yedinden bana vâsıl ve zimmetinde yirmi bin akçesi bâkī olup hâlâ meblağ-ı bâkī yirmi bin akçeyi taleb ederim dedikde gıbbe’s-suâl mezbûr el-Hâc Hasan mecmû‘-ı deynim seksen üç bin akçeden zâid değildir diye ziyâdeyi münkir olucak müdde‘iye-i mezbûreden sıdk-ı makāline beyyine taleb olundukda udûl-i müslimînden ve fuhûr-i muvahhidînden Ahi Baba demekle ma‘rûf Mehmed b. Mustafa ed-Debbâğ ve Kemal b. Hüseyin ed-Debbâğ ve Hasan b. Mahmud ed-Debbâğ meclis-i şer‘a li ecli’ş-şehâde hâzırûn olup fi’l-vâki‘ müteveffâ-yı mezbûrun muhallefâtı taksîm olunup tahrîr-i defter olundukda müteveffâ-yı mezbûr zimemi yoklandıkda mezbûr el-Hâc Hasan benim müteveffâ-yı mezbûra esbâb ve bâğât bahâsından doksan üç bin akçe deynim vardır diye i‘tirâf eyleyip bizi işhâd eyledi biz bu husûsa şahidleriz şehâdet dahi ederiz diye edâ-i şehâdet-i şer‘iyye ettiklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâki‘ olup mûcebi ile hükm ve mâ vaka‘a zabt olundu. Tahrîren fi’l-yevmi’t-tâsi‘ min Recebi’l-mürecceb sene sitte aşere ve elf. Şuhûdü’l-hâl: Ahmed Çelebi b. Hızır ...?, İbrahim Çelebi b. Mustafa Çelebi ...?, Mustafa b. Mehmed, Mehmed b. Yusuf, Ahmed Çelebi Sofu ve gayruhüm